پلوامہ:۷، فروری:پلوامہ پولیس نے نقلی پستول کی نوک پر لوگوںکوڈرادھمکاکر لوٹنے والے ایک لٹیرے کوثبوت سمیت دبوچ لیا۔جے کے این ایس کے مطابق پولیس نے ایک بیان میں کہاکہ منگل کو پلوامہ ضلع میں ایک بھتہ خور کو گرفتار کیا گیا، جو خودکو ملی ٹنٹ جتلاکرلوگوںکولوٹتاتھا۔بیان کے مطابق پولیس ا سٹیشن راجپورہ کو ایک شخص کی طرف سے تحریری شکایت موصول ہوئی (سیکورٹی وجوہات کی بناءپر نام چھپایا گیا)، جس میں اس نے بتایا کہ تقریباً ساڑھے7بجے جب وہ اپنے کلینک سے گھرکی جانب جا رہا تھا، ایک نامعلوم شخص نے اُسے روکا اور اسے ہتھیاروں سے ڈرایا اور دھمکی دی۔ رقم اور دیگر قیمتی چیزیں مانگیں اور اس کا پرس جس میں 3330روپے اور موبائل فون تھا،نامعلوم شخص چھین کر موقع سے فرار ہو گیا۔پولیس ترجمان نے مزید کہا کہ اس تحریری شکایت پر قانون کی متعلقہ دفعات کے تحت مقدمہ ایف آئی آر نمبر 8/2023پولیس تھانہ راجپورہ میں درج کر کے تفتیش شروع کر دی گئی ۔تفتیش کے دوران متعدد افراد کو پوچھ تاچھ کیلئے پکڑا گیا جن میں سے ایک کی شناخت عادل آہ ڈار ولد یوسف ڈار ساکنہ بیلو سے پیشہ وارانہ طور پر پوچھ گچھ کی گئی جس نے انکشاف کیا کہ اُس نے کھلونا پستول کے ذریعے مذکورہ جرم کیا ہے۔پولیس کے مطابق گرفتار ملزم کے انکشاف پر2کھلونا پستول، 3 بٹوے، ایک ریڈمی موبائل فون،3330 روپے کی نقد رقم، جے کے بینک کا اے ٹی ایم کارڈ، آدھار کارڈ، ایس بی آئی اے ٹی ایم کارڈ، ڈرائیونگ لائسنس، پین کارڈ، الیکشن کارڈ، جیو سم کارڈ برآمد ہوئے ۔پولیس نے کہاکہ عوام الناس سے گزارش ہے کہ ایسے کسی بھی جال میں نہ پھنسیں اور ایسے کسی بھی واقعے کے بارے میں متعلقہ تھانے کو اطلاع دیں۔