جنگلی حیات کا عالمی دن: ترال میں بیداری پروگرام منعقد
بشارت رشید
پلوامہ: جنوبی کشمیر کے ترال علاقے میں محکمہ وائلڈ لائف نے جمعہ کو جنگلی حیات کے عالمی دن پر ایک بیداری پروگرام کا انعقاد کیا۔ یہ پروگرام سیاحتی گاؤں شکار گاہ ترال میں منعقد ہوا، جس میں مقامی سرکاری اسکول کے کئی طلباء نے شرکت کی، جنہوں نے جنگلی حیات کی اہمیت کے بارے میں پیغام پھیلانے کے لیے بینرز اٹھا رکھے تھے۔ اس موقعے پر وائلڈ لائف وارڈن، پلوامہ/شوپیان رینج، انتصار سہیل مہمان خصوصی کے بطور موجود تھے، جنہوں نے جنگلی حیات کی اہمیت پر روشنی ڈالی، اور طلباء سے کہا کہ وہ جنگلی حیات کے تحفظ کو یقینی بنائیں۔ انتصار سہیل نے کہا کہ جنگلی حیات کے عالمی دن کے موقعے پر آگاہی پروگرام منعقد کرنے کا مقصد طلباء کو ان کے علاقوں میں موجود جنگلی جانوروں کے بارے میں آگاہی کے علاوہ ان کی حفاظت کے طریقوں سے آگاہ کرنا تھا۔ اس دوران شکار گاہ گاؤں میں ایک صفائی مہم چلائی گئی، جس میں طلباء اور وائلڈ لائف کے ملازمین نے مشترکہ طور پر علاقے میں صفائی ستھرائی عمل میں لائی۔ پروگرام کے دوران وائلڈ لائف وارڈن کے علاوہ، رینج آفیسر ترال، شوکت جان، محکمہ کے بلاک آفیسرز اور اساتذہ بھی موجود تھے۔