سرینگر:۲۱،مئی:حکومت نے جمعہ کوکہاکہ اس ماہ کے آخر میں سری نگرمیں منعقد ہونے والے جی 20 ایونٹ میں شرکت کرنے والے غیرملکی مندوبین عالمی سطح پر جموں و کشمیر اوراس کی سیاحت کےلئے برانڈ ایمبیسیڈر کے طور پر کام کریں گے، جس سے مقامی کاروبار کو فروغ ملے گا۔خیال رہے جی 20ٹورازم ورکنگ گروپ کی تین روز میٹنگ 22سے24مئی 2023تک جھیل ڈل کے کنارے پرواقع شیر کشمیرانٹرنیشنل کنووینشن سینٹرSKICCسری نگرمیں منعقد ہوگی۔جے کے این ایس کے مطابق محکمہ سیاحت کے سکریٹری سید عابد رشید شاہ نے کہاکہ جی 20 ایونٹ جموں و کشمیر اور اس کی سیاحت’بلاواسط اور بالواسطہ‘طور پرکشمیری دستکاری، ہینڈلوم، مہمان نوازی اور تجارت جیسے دیگر منسلک شعبوں کےلئے ایک بہترین موقع ہے۔سید عابد رشید شاہ نے مزید کہا کہ غیرملکی مندوبین عالمی سیاحتی مقام کے طور پر دنیا بھر میں جموں و کشمیر کے سفیر کے طور پر کام کریں گے۔زبرون پارک سری نگر میں ہاٹ ایئر بیلون، سائیکلنگ اور ٹریکنگ سرگرمیوں کا افتتاح کرنے کے بعد صحافیوں سے بات کرتے ہوئے، محکمہ سیاحت کے سکریٹری سید عابد رشید شاہ نے کہا کہ ایسی سرگرمیاں سیاحوں کے لئے مزید پرکشش مقامات کا کام کریں گی۔سیاحت کے سکریٹری نے کہا کہ اس طرح کی مہم جوئی کی سرگرمیوں کا آغاز مرکزی G20 ایونٹ کا پیش خیمہ ہے۔انہوںنے کہا کہ ایک سائیکلتھون جس میں زیادہ تر حصہ لینے والوں کا تعلق سرکاری اسکولوں سے ہے بھی شروع کیا گیا ہے۔سیدعابد رشیدشاہ نے مزید کہا کہ مستقبل میں اس طرح کی تقریبات کو بڑھایا جائے گا تاکہ سیاح اور مقامی لوگ یونین ٹیریٹری میں ایڈونچر ٹورزم سے لطف اندوز ہوں۔