سری نگر:۹۲،مارچ: : لیفٹیننٹ گورنر منوج سنہا نے رام بن سڑک حادثے میں جانی نقصان پر صدمے اور غم کا اظہار کیا ہے۔ادھروزیر اعظم نریندر مودی نے جمعہ کے روز المناک رام بن سڑک حادثے میں جانوں کے ضیاع پر تعزیت کا اظہار کیا اور مرنے والوں میں سے ہر ایک کے لواحقین کو وزیر اعظم کے قومی ریلیف فنڈ سے 2 لاکھ روپے اور زخمیوں کے لئے 50ہزار روپے کی ایکس گریشیا کا اعلان کیا۔ جے کے این ایس کے مطابق ایک تعزیتی پیغام میں، لیفٹیننٹ گورنر نے کہاکہ میں آج رام بن میں ہونے والے بدقسمت سڑک حادثے کے بارے میں جان کر گہرا صدمہ پہنچا ہوں، جس میں قیمتی جانیں ضائع ہوئیں،میں سوگوار خاندانوں سے دلی تعزیت کرتا ہوں۔لیفٹیننٹ گورنر منوج سنہا نے کہاکہ میں نے ضلعی انتظامیہ اور ڈویڑنل کمشنر کو ہدایات جاری کی ہیں کہ وہ مہلوکین کے لواحقین کو ہر طرح کی مدد فراہم کریں، جیسا کہ اصول میں فراہم کیا گیا ہے۔اس دوران مرکزی وزیر ڈاکٹر جتیندر سنگھ نے غمزدہ خاندانوں کے تئیں تعزیت کا اظہار کیا جنہوں نے اس حادثے میں اپنے کنبہ کے افراد کو کھو دیا ہے۔ ڈاکٹر جتیندر سنگھ نے کہاکہ اس المناک سڑک حادثے کے بارے میں جاننے کے بعدڈی سی رام بن بصیر الحق سے بات کی ،اورحکام کیساتھ میں مسلسل رابطے میں ہوں۔ دریں اثناء صدر دروپدی مرمو نے جمعہ کو جموں و کشمیر میں ایک سڑک حادثے میں جانوں کے ضیاع پرصدمے کا اظہار کیا اور سوگوار خاندانوں سے تعزیت کا اظہار کیا۔صدر مرمو نے ایکس پر ہندی میں اپنے تعزیتی پیغام میں کہاکہ جموں سری نگر قومی شاہراہ پر رام بن علاقے میں ایک گاڑی کے کھائی میں گرنے سے لوگوں کے ہلاک ہونے کی خبر بہت افسوسناک ہے۔ میں سوگوار خاندانوں سے تعزیت پیش کرتی ہوں۔اس دوران ڈاکٹرفاروق، عمر عبداللہ،محبوبہ مفتی ،غلام نبی آزاد،سید الطاف بخاری اوردیگر سیاسی لیڈروں نے رام بن حادثہ میں جانوں کے ضیاع پر افسوس کا اظہار کیا۔انہوںنے سوگوار خاندان کے افراد سے دلی تعزیت کا اظہار کیا اور انتظامیہ سے متاثرہ خاندانوں کی ہر ممکن مدد کی اپیل کی۔نیشنل کانفرنس کے صدر ڈاکٹر فاروق عبداللہ اور نائب صدر عمر عبداللہ نے جمعہ کو رامبن میں ہونے والے المناک سڑک حادثے پر دکھ کا اظہار کیا جس میں 10 افراد اپنی قیمتی جانوں سے ہاتھ دھو بیٹھے۔نیشنل کانفرنس کے صدرفاروق عبداللہ اور پارٹی کے نائب صدرعمرعبداللہ نے ایکس پر ایک پوسٹ میں سوگوار خاندان کے افراد سے دلی تعزیت کا اظہار کیا اور انتظامیہ سے متاثرہ خاندانوں کی ہر ممکن مدد کی اپیل کی۔