عمرعبداللہ بارہمولہ،آغارُوح اللہ سری نگر نشست کیلئے نیشنل کانفرنس کے اُمیدوارنامزد

سری نگر:۹،اپریل:جے کے این ایس : حالیہ کچھ دنوں کی قیاس آرائیوں کے بالکل برعکس نیشنل کانفرنس نے پارٹی کے نائب صدر عمرعبداللہ کو شمالی کشمیر کی بارہمولہ لوک سبھا سیٹ اور وسطی کشمیرکی سری نگر پارلیمانی نشست کیلئے سابق وزیر اوربااثر شیعہ رہنما آغا رُوح اللہ کو بطور اُمیدوار نامزد کردیا جبکہ پارٹی نے پہلے ہی سابق وزیر اور معروف گوجررہنما میاں الطاف احمد کو اننت ناگ ،راجوری نشست کیلئے اپنا اُمیدوار نامزدکیاہے ۔جے کے این ایس کے مطابق اہم علاقائی سیاسی جماعت نیشنل کانفرنس نے جمعہ کو یہاں اعلان کیاکہ پارٹی کے نائب صدر اور سابق وزیر اعلیٰ عمر عبداللہ بارہمولہ لوک سبھا حلقہ سے الیکشن لڑیں گے۔نیشنل کانفرنس کے صدرڈاکٹر فاروق عبداللہ نے جمعہ کو یہاں دیگر سینئر لیڈروں کے ہمراہ ایک پریس کانفرنس سے خطاب کرتے ہوئے اعلان کیاکہ عمر عبداللہ شمالی کشمیر کی بارہمولہ پارلیمانی سیٹ سے پارٹی کے امیدوار ہیں۔عمرعبداللہ بارہمولہ لوک سبھا سے لڑیں گے جہاں وہ پیپلز کانفرنس کے صدر سجاد غنی لون کےساتھ براہ راست مقابلہ کریں گے۔انہوں نے یہ بھی اعلان کیا کہ شعلہ بیان شیعہ رہنما آغا سید روح اللہ مہدی وسطی کشمیر کے سری نگر حلقہ سے الیکشن لڑیں گے، جو این سی کا گڑھ رہا ہے۔بارہمولہ میں20 مئی کو پولنگ ہوگی۔عمرعبداللہ نے 1998میں سری نگر سے لوک سبھا ممبر کی حیثیت سے سیاست میں شمولیت اختیار کی۔ وہ 1999 اور 2004 میں 2بارلوک سبھا کےلئے منتخب ہوئے۔انہوں نے 1999کے پارلیمانی انتخابات کے بعدبننے والی اٹل بہاری واجپائی حکومت میں مرکزی وزیر کے طور پر بھی خدمات انجام دیں۔عمرعبداللہ 2002کے ریاستی انتخابات میں گاندربل سے پی ڈی پی کے قاضی افضل سے ہار گئے، جسے عبداللہ کا گڑھ سمجھا جاتا ہے۔2008 کے انتخابات میں، انہوں نے گاندربل حلقہ سے کامیابی حاصل کی۔ 2014 کے اسمبلی انتخابات میں عمرعبداللہ2اسمبلی حلقوں سے لڑے تھے۔ انہیں سوناور حلقہ سے پی ڈی پی کے محمد اشرف میر نے شکست دی لیکن بیروہ سیٹ سے نذیر احمد خان کے خلاف کم فرق سے کامیابی حاصل کی۔بڈگام کے ایک بااثر شیعہ رہنما، آغا روح اللہ مہدی 3 بار رُکن اسمبلی رہے ہیں۔