پلوامہ سے اونتی پورہ تک جانے والی رابطہ سڑک پر میکڈم بچھانے کے ساتھ ساتھ اس راستے کو چوڑا کیا جائے / مقامی آبادی کا مطالبہ

سرینگر /23جون / پلوامہ سے اونتی پورہ تک جانے والی رابطہ سڑک پر میکڈم بچھانے اور اس راستے کو چوڑا کرنے کا مطالبہ کرتے ہوئے مقامی لوگوں نے الزام عائد کیا ہے کہ انتہائی اہمت کی حامل اس رابطہ سڑک کو ہمیشہ نظر انداز کیا گیا ہے ۔ سی این آئی کو نمائندے مزمل یعقوب نے اس ضمن میں تفصیلات فراہم کرتے ہوئے بتایا کہ پلوامہ سے اونتی پورہ تک جانے والی رابطہ سڑک جگہ جگہ پر خستہ ہو چکی ہے اور مقامی آبادی نے مطالبہ کیا کہ اس سڑ ک پر میکڈم بچھایا جائے ۔ انہوں نے کہا کہ اس کے علاوہ مقامی آبادی کا مطالبہ ہے کہ ٹریفک جام اور حادثات کو روکنے کیلئے راستے کے ساتھ تنگ جگہوں کو چوڑا کرنے کا مطالبہ کیا ہے۔مقامی لوگوں کے مطابق پلوامہ اونتی پورہ سڑک کے کچھ مقامات پر سڑک کی تنگی کے نتیجے میں ٹریفک جام ہوتا ہے اس کے علاوہ سڑک کی حالت بھی بہت خستہ ہے۔نمائندے سے بات کرتے ہوئے ایک مقامی رہائشی سمیر احمد نے کہا”حکومت کو اس اہم سڑک کو چوڑا کرنے کیلئے فوری اقدامات کرنے چاہئے خاص طور پر کوئل کے علاقے میں کیونکہ وہاں سڑک کافی تنگ ہے ۔ انہوں نے کہا کہ سڑک اس وقت کئی مقامات پر خستہ ہو چکی ہے اور ان مقامات پر سڑک کی فوری مرمت کی ضرورت ہے۔مدثر احمد، ایک اور مقامی نے حکومت پر زور دیا کہ وہ اس اہم سڑک پر خصوصی توجہ دے، انہوں نے مزید کہا کہ اونتی پورہ، ترال اور دیگر علاقوں کو ضلع ہیڈکوارٹر سے جوڑنے والی اس اہم سڑک کی تنگی کی وجہ سے ٹریفک میں بھی اکثر خلل پڑتا ہے۔ان کا کہنا تھا کہ یہ مسئلہ متعدد بار متعلقہ حکام کے نوٹس میں لانے کے باوجود اس سلسلے میں کوئی کارروائی نہیں کی گئی۔ انہوں نے اعلیٰ حکام سے درخواست کی کہ اس معاملے کا جلد از جلد جائزہ لیا جائے اور فوری کارورائی کی جائے تاکہ مقامی لوگوں کو مزید پریشانی کا سامنا نہ کرنا پڑے۔