سرینگر//کے این ایس13ستمبر مرکزی وزیر ڈاکٹر جتیندر سنگھ نے آج کہا کہ میڈیا حکومت اور عوام کے درمیان ایک مو¿ثر پل کا کردار ادا کرتا ہے اور مختلف سرکاری اسکیموں اور اقدامات کے بارے میں عوامی بیداری پھیلانے میں کلیدی حیثیت رکھتا ہے۔ وہ یہاں محکمہ اطلاعات و نشریات، حکومت ہند کے زیرِ اہتمام پریس انفارمیشن بیورو (پی آئی بی) جموں کی جانب سے منعقدہ میڈیا ورکشاپ "ورتالاپ”سے بحیثیت مہمانِ خصوصی خطاب کر رہے تھے۔کشمیرنیوز سروس ( کے این ایس ) کے مطابق انہوںنے اپنے خطاب میں کہا کہ حکومت کی طرف سے شروع کی جانے والی فلاحی اسکیموں اور پروگراموں کی کامیابی اس بات پر منحصر ہے کہ ان کی جانکاری کتنی بروقت اور درست طریقے سے عوام تک پہنچتی ہیں۔ انہوں نے کہا کہ میڈیا نہ صرف عوام کو باخبر رکھتا ہے بلکہ شفافیت اور عوامی شمولیت کو بھی یقینی بناتا ہے۔انہوں نے کہا کہ میڈیا کامیاب کہانیاں سامنے لا کر عوام کو حوصلہ دیتا ہے تاکہ زیادہ سے زیادہ لوگ سرکاری اسکیموں سے فائدہ اٹھا سکیں۔ اس موقعے پر انہوں نے کہا کہ "آروما مشن” جموں و کشمیر میں اس کی بہترین مثال ہے، جو لوگوں کو سرکاری نوکری کی ذہنیت سے باہر نکال رہا ہے پی آئی بی جموں کی ڈائریکٹر نیہا جلالی نے اس موقع پر کہا کہ میڈیا حکومت ہند کی فلیگ شپ اسکیموں کو عوام تک پہنچانے میں بنیادی کردار ادا کر رہا ہے اور پی آئی بی میڈیا کو مستند معلومات کی فراہمی میں ہر ممکن تعاون فراہم کرے گا تاکہ اسکیموں کے فوائد نچلی سطح تک پہنچ سکیں۔
