جموں/17اپریل 2026ئلیفٹیننٹ گورنر منوج سِنہا نے جمعہ کے روز بھگوان پرشورام جی جینتی کی یاد میں چانکیہ چوک پریڈ جموں سے ایک بڑی شوبھا یاترا کو جھنڈی دِکھا کر روانہ کیا۔ اِس جلوس کا اہتمام ڈوگرہ برہمن پرتی ندھی سبھا نے کیا تھا جس میں بھگوان پرشورام جو بھگوان وشنو کے چھٹے اوتار ہیں، کی زِندگی اور تعلیمات کواُجاگر کیا گیا ہے۔اِس سے قبل لیفٹیننٹ گورنر نے بھگوان پرشورام کو گلہائے عقیدت پیش کئے اور سب کے لئے اَمن، ترقی اور خوشحالی کی دعا کی۔ فلیگ آف تقریب میں صدر ڈوگرہ برہمن پرتی ندھی سبھا وید پرکاش شرما اور آرگنائزنگ کمیٹی کے ممبران جن میں پرشوتَم چندر شرما، چندر موہن شرما، سوجنیا شرما، سریندر شرما، بی ڈِی شرما، اِنجینئر راجیش اور رمن شرما شامل تھے، مذہبی تنظیموں کے سربراہان، ممتازشہری اور مختلف شعبہ ہائے زِندگی سے تعلق رکھنے والے اَفراد نے شرکت کی۔اِس موقعہ پرممبران قانون ساز اسمبلی یدھ ویر سیٹھی اور دیویانی رانا، سینئر اَفسران اور ممتازشہری بھی موجود تھے۔
