وزیر برائے خوراک ، شہری سپلائی اورامور صارفین ، انفارمیشن ٹیکنالوجی ، ٹرانسپورٹ ، یوتھ سروسز اینڈ سپورٹس اور سائنس و ٹیکنالوجی مسٹر ستیش شرما نے آج مرکزی وزیر برائے ریلوے ، اطلاعات و نشریات اور الیکٹرانکس اور انفارمیشن ٹیکنالوجی مسٹر اشونی ویشنو سے ملاقات کی اور سرحدی ضلع راجوری اور پونچھ کو ریل لنک سے جوڑنے کے زیر التوا پروجیکٹ کی پُر زور وکالت کی ۔
میٹنگ کے دوران مسٹر ستیش شرما نے مرکزی وزیر ایلوے سے مطالبہ کیا کہ وہ مجوزہ جموں ۔ اکھنور ۔ ڈوری ڈگر ۔ سندر بنی ۔ نوشہرہ ۔ راجوری ۔ پونچھ ریل کوریڈور کو ترجیح دیں اور اسے جموں کے سرحدی ضلع اور کشمیر کے لوگوں کیلئے ایک بہت بڑا اسٹریٹجک ، اقتصادی اور سماجی اہمیت کا منصوبہ قرار دیا ۔
وزیر نے اس بات پر روشنی ڈالی کہ مجوزہ ریل الائنمنٹ کیلئے ماضی میں ایک سروے کیا گیا تھا اور اس کے احیاءاور جلد عملدرآمد کی ضرورت پر زور دیا ۔ انہوں نے اس بات پر زور دیا کہ راجوری اور پونچھ ملک کے ان چند بڑے خطوں میں سے ایک ہیں جو اپنی سٹریٹجک اہمیت اور کافی آبادی کے باوجود ریل رابطے سے محروم ہیں ۔
وزیر نے مزید کہا کہ اس منصوبے سے خطے میں سیاحت ، تجارت ، صنعت اور روز گار کے نئے مواقع پیدا ہوں گے ۔ انہوں نے کہا کہ بہتر ریل انفراسٹرکچر سرحدی اضلاع کو قومی معیشت کے ساتھ زیادہ قریب سے مربوط کرنے اور ان کی سماجی و اقتصادی ترقی کو تیز کرنے میں مدد کرے گا ۔
