سری نگر/ جموں و کشمیر میں دو روزہ خصوصی ووٹر اِندراج مہم آج اِختتام پذیر ہوئی۔اِس مہم کے دوران ووٹروں کی جانب سے زبر دست ردِّعمل دیکھنے میں آیا جبکہ اِنتخابی عملے نے ووٹر رجسٹریشن کو آسان بنانے، عوامی شکایات کے اَزالے اور اِنتخابی خدمات کے بارے میں بیداری پیداکرنے کے لئے بڑے پیمانے پر عوامی رابطہ مہم چلائی۔10 اور 11 اکتوبر کو منعقد ہ یہ مہم یونین ٹیریٹری کے تمام پولنگ سٹیشنوں پر دونوں دن صبح 9 بجے سے شام 5 بجے تک جاری رہی۔ اِس مہم اہل شہریوں کو ووٹر کے طور پر اَپنا اِندراج کرنے، اَپنی اِنتخابی تفصیلات میں درستگی یا اَپ ڈیٹ کروانے اور اِنتخابی اِندراج سے متعلق معاملات میںمدد حاصل کرنے کا موقع فراہم کیا ۔ اِس مہم کا بنیادی مقصد الیکشن کمیشن آف انڈیا کے رہنما اصول ”کوئی بھی اہل ووٹر اندراج سے محروم نہ رہے“ کو یقینی بنانا تھا۔یہ مہم چیف الیکٹورل آفیسرجموں و کشمیر، سنجیو ورما کی مجموعی نگرانی میں چلائی گئی جبکہ ضلع سطح کی انتخابی مشینری نے انتظامات میں تال میل قائم کرتے ہوئے پوری یونین ٹیریٹری میں ووٹر اِندراج کی خدمات کی فراہمی میں سہولیت فراہم کی۔ضلع الیکشن اَفسران، الیکٹورل رجسٹریشن اَفسران، ڈپٹی ڈائریکٹر اِنفارمیشن (نوڈل آفیسر سویپ( ایس وِی اِی اِی پی )، اسسٹنٹ الیکٹورل رجسٹریشن اَفسران اور الیکشن نائب تحصیل داروں (اِی این ٹیز) نے اَپنے اَپنے دائرہ اِختیار میں اس مہم کی نگرانی کی جبکہ بوتھ لیول اَفسران (بی ایل اوز) نے پولنگ سٹیشنوں اور زمینی سطح پر ووٹروں کی رہنمائی اور معاونت میں کلیدی کردار اَدا کیا۔
