سرینگر/ 10 جون:
جموں وکشمیر کے لیفٹیننٹ گورنر منوج سنہا نے ریاسی میں ہوئے دہشت گردانہ حملے کی سخت الفاظ میں مذمت کرتے ہوئے لواحقین کے ساتھ تعزیت کا اظہار کیا ہے۔انہوں نے کہاکہ وزیر اعظم نریندر مودی نے ہدایت دی کہ وہ صورتحال پر مسلسل نظر رکھیں اور متاثرہ خاندانوں کی ہر ممکن مدد کو یقینی بنائیں۔ایل جی منوج سنہا نے ایکس پر لکھا :’میں ریاسی میں ہوئے بزدلانہ دہشتگردانہ حملے کی سخت الفاظ میں مذمت کرتا ہوں ۔ ‘انہوں نے کہاکہ جموں وکشمیر پولیس اور سیکورٹی فورسز نے دہشت گردوں کو پکڑنے کی خاطر مشترکہ آپریشن لانچ کیا ہے۔منوج سنہا نے کہاکہ حملے کے بعد وزیر اعظم نریندر مودی نے صورتحال کا جائزہ لیا اور حالات پر مسلسل نظر رکھنے کی ہدایت دی ۔ان کے مطابق حملے میں ملوث تمام افراد کو جلد سزا دی جائے گی ۔عزت مآب وزیر اعظم مودی نے یہ بھی ہدایت کی ہے کہ زخمیوں کو بہتر طبی امداد اورہر ممکن مدد فراہم کی جائے۔
