سرینگر/// وزیر اعظم نریندر مودی نے ہفتہ کو کہا کہ جموں و کشمیر میں دہشت گردی اپنی آخری سانسیں لے رہی ہے جہاں ان کی حکومت نے خاندانی سیاست کا مقابلہ کرنے کے لیے ایک نئی قیادت کو پیش کیا جس نے "اس خوبصورت خطہ کو تباہ کر دیا”۔انہوں نے کہا سال2014میں اقتدار میں آنے کے ساتھ ہی ہم نے نوجوان قیادت کو تیار کرنے پر توجہ مرکوز کی ہے۔کشمیر نیوز سروس ( کے این ایس ) کے مطابق جموں خطہ کے ڈوڈہ ضلع میں بی جے پی امیدواروں کی حمایت میں ایک انتخابی ریلی سے خطاب کرتے ہوئے پی ایم مودی نے کہا کہ ہم اور آپ مل کر جموں و کشمیر کو ملک کا ایک محفوظ اور خوشحال حصہ بنائیں گے۔18ستمبر کو ہونے والے اسمبلی انتخابات کے پہلے مرحلے سے پہلے وزیر اعظم کی یہ پہلی انتخابی ریلی تھی۔آزادی کے بعد جموں و کشمیر بیرونی طاقتوں کا نشانہ بن گیا اور خاندانی سیاست نے اس خوبصورت خطے کو اندر سے کھوکھلا کر دیا۔ سیاسی خاندانوں نے اپنے بچوں کو پیش کیا اور نئی قیادت کو بڑھنے نہیں دیا،“ وزیراعظم نے کہا۔انہوں نے کہا کہ ان کی حکومت نے 2014میں مرکز میں برسراقتدار آنے کے فوراً بعد ایک نوجوان قیادت کی تشکیل پر توجہ مرکوز کی۔انہوں نے مزید کہا کہ جموں و کشمیر میں دہشت گردی آخری سانسیں لے رہی ہے۔
