سرینگر:۱۸ ستمبر
لیفٹنٹ گورنر مسٹر منوج سنہا نے اسمبلی انتخابات کے پہلے مرحلے کے ووٹروں کو ریکارڈ ٹرن آؤٹ کیلئے دلی مبارکباد پیش کی ہے ۔ ایک سوشل میڈیا پوسٹ میں لفٹینٹ گورنر نے کہا پر جوش شرکت ہندوستانی جمہوریت کی مضبوطی اور جمہوری اقدار پر لوگوں کے اعتماد کا ثبوت ہے ۔ لفٹینٹ گورنر نے X پر پوسٹ کیا ۔ ایک تاریخی ووٹر ٹرن آؤٹ کیلئے جے اینڈ کے کو مبارک ہو ۔ میں تمام ووٹروں کا شکریہ ادا کرنا چاہتا ہوں جنہوں نے پہلے مرحلے میں اپنا حق رائے دہی استعمال کیا ۔ پُر امن ، آزادانہ اور منصفانہ انتخابات میں ریکارڈ پولنگ ہندوستانی جمہوریت کی مضبوطی اور جمہوری اقدار پر لوگوں کے اعتماد کی تصدیق کرتی ہے ۔ یں اپنے تمام بھائی ، بہنوں اور پہلی بار ووٹ دینے والوں کو جمہوریت کا تہوار منانے کیلئے بڑی تعداد میں شرکت کرنے پر مبارکباد دیتا ہوں ۔ سیکورٹی فورسز ، جے کے پی اور انتخابی عہدیداروں کا تہہ دل سے شکریہ ادا کرتا ہوں ۔ پہلے مرحلے میں تقریباً 59 فیصد پولنگ سے ظاہر ہوتا ہے کہ جموں و کشمیر میں جمہوریت پھل پھول رہی ہے ۔ ڈوڈہ ، کشتواڑ ، رام بن ، پلوامہ ، شوپیاں ، کولگام اور اننت ناگ میں ووٹروں کی لمبی قطاروں نے مخالفین کے پروپیگنڈے کو منہدم کر دیا ۔ لوگوں نے تقسیم کرنے والے عناصر کے ایجنڈے کو بھی مسترد کر دیا ہے اور جمہوریت پر اپنے اعتماد کا اعادہ کیا ۔
