سری نگر:۳ ،اکتوبر: : ماہ جون 2024میں پارلیمانی انتخابات کے 3ماہ بعد اسمبلی انتخابات کا انعقادہونے کے بعد اب رواں سال کے اواخرمیں بلدیاتی اور پنچایتی الیکشن کرائے جانے کی بارزگشت سنائی دے رہی ہے اور یوں جموں وکشمیر میں محض7ماہ کے دوران تیسرے طرز کے انتخابات کرائے جانے کاامکان ہے۔جے کے این ایس کے مطابق ایک میڈیا رپورٹ میں اعلیٰ سرکاری ذرائع کا حوالہ دیتے ہوئے رپورٹ کیاگیا ہے کہ اسمبلی انتخابات کا کامیاب انعقاد کے بعد، حکومت اب اس سال کے آخر تک جموں و کشمیر میں میونسپل اور پنچایتی انتخابات کرانے کی تیاری کر رہی ہے۔اعلیٰ ذرائع کے مطابق ایک منصوبہ بند اقدام کے تحت اسمبلی انتخابات کے پرامن انعقاد کو یقینی بنانے کےلئے تعینات سیکورٹی فورسز اور نیم فوجی دستے، بلدیاتی اور پنچایتی انتخابات کے مکمل ہونے تک جموں و کشمیر میں موجود رہیں گے۔ذرائع نے انکشاف کیا کہ سیکو رٹی فورسز کو برقرار رکھنے کا فیصلہ انتخابات کے دوسرے دور کےلئے فورسز کی دوبارہ تعیناتی سے منسلک اہم اخراجات سے بچنے کی ضرورت سے کیا گیا ہے۔جموں وکشمیرکی موجودہ حکومت نے طے کیا ہے کہ اس سال کے آخر تک میونسپل اور پنچایتی انتخابات کے انعقاد تک ان فورسز کےلئے رہنا زیادہ موثر ہوگا۔جموں اور سری نگر دونوں شہروں میں میونسپل کارپوریشنوں کی مدت نومبر2023 میں ختم ہو گئی تھی۔ قانونی تقاضوں کے مطابق، انتخابات کارپوریشن کی مدت ختم ہونے سے پہلے یا اس کے فوراً بعد ہونے چاہیں۔ تاخیر نے ان انتخابات کے انعقادکو طول دیا ہے، جس سے حکومت کو ان کی تکمیل کو ترجیح دینے پر مجبور کر دیا گیا ہے۔یادرہے نیم فوجی اور سیکورٹی فورسز، ابتدائی طور پرسالانہ امرناتھ یاترا کےلئے تعینات کئے گئے تھے اور بعد میں پارلیمانی انتخابات کے دوران ان کی تعیناتی میں توسیع کی گئی تھی، اوراب بھی سیکورٹی فورسزکی اضافی کمپنیاں جموں وکشمیرمیں تعینات ہیں۔ سرکاری ذرائع نے مزید کہا کہ سیکورٹی فورسز کی موجودگی میں مزید اضافہ ہو گا تاکہ آنے والے بلدیاتی انتخابات کے پرامن انعقاد کو یقینی بنایا جا سکے۔قابل ذکر ہے کہ وزیر اعظم نریندر مودی اور وزیر داخلہ امت شاہ دونوں نے اسمبلی انتخابات کےلئے اپنی مہم کے دوران، جموں و کشمیر میں نچلی سطح پر جمہوریت کو مضبوط کرنے کے لئے بی جے پی کے عزم کااظہارکیا ۔ انہوں نے میونسپل، پنچایت، بلاک ڈیولپمنٹ کونسل اور ڈسٹرکٹ ڈیولپمنٹ کونسل کے انتخابات کے کامیاب انعقاد کو اس کوشش میں اہم سنگ میل کے طور پر اجاگر کیا۔۔
