لولگام/ وزیر برائے صحت و طبی تعلیم، سماجی بہبود اور تعلیم محکمہ جات سکینہ اِیتو نے آج ضلع ہسپتال کولگام ایک نوزائیدہ بچے کو پولیو کے قطرے پلا کر ’پلس پولیو امیونائزیشن مہم ‘ کا آغاز کیا ۔اِس موقعہ پر ضلع ترقیاتی کمشنر کولگام شہزاد عالم ، ڈائریکٹر فیملی ویلفیئر جموں و کشمیر، چیف میڈیکل آفیسر، میڈیکل سپراِنٹنڈنٹ اور دیگر اَفسران بھی موجود تھے۔وزیر موصوفہ نے اِس بات پر زور دیا کہ حفاظتی ٹیکہ جات بچوں کو قابل تدارک بیماریوں سے بچانے اور نئی نسل کے صحت مند مستقبل کو یقینی بنانے کے لئے سب سے مو¿ثر اَقدامات میں سے ایک ہے۔اُنہوں نے والدین اور سرپرستوں پر زور دیا کہ وہ صفر سے 5 سال تک کی عمر کے تمام بچوں کو قریبی ویکسی نیشن مراکز پر لے آئیںاور اِس بات کو یقینی بنائیں کہ کوئی بھی بچہ اس امیونائزیشن مہم سے محروم نہ رہے۔ اُنہوں نے کہا کہ پولیو سے پاک حیثیت کے حصول اور اسے برقرار رکھنے کے لئے کمیونٹی کی فعال شرکت اور اِجتماعی ذمہ داری کی ضرورت ہے۔وزیر صحت نے بچوں کی صحت کے لئے پیشہ ور اَفراد اور فرنٹ لائن ورکروں کی مسلسل خدمات کو بھی سراہا اور’ پلس پولیو پروگرام‘ کو مکمل کامیاب بنانے کے لئے بیداری مہمات کو مزید تیز کرنے پر زور دیا۔اُنہوںنے ا س یقین کا اظہار کیا کہ عوام کے مسلسل تعاون اور محکمہ صحت کی لگن و محنت سے ہر اہل بچے تک پہنچنے کا مقصد کامیابی سے حاصل کیا جا سکتا ہے۔
