سری نگر/وزیر برائے خوراک، شہری رسدات و اَمورِ صارفین ، اِنفارمیشن ٹیکنالوجی، اَمورِ نوجواناں و کھیل کود، سائنس و ٹیکنالوجی اور اے آر آئی و ٹریننگ محکمہ جات ستیش شرما نے آج جموں ریلوے سٹیشن سے سومناتھ جی یاترا کو جھنڈی دِکھا کر روانہ کیا۔ اس تقریب کا اہتمام محکمہ کلچر نے ہندوستان کے عظیم ثقافتی اور روحانی ورثے کو فروغ دینے کے لئے جاری اقدامات کا حصہ ہے ۔ اِس کا مقصد یاتریوں اور ثقافتی تبادلوں کے ذریعے قومی یکجہتی کے رِشتوں کو مزید مضبوط بنانا ہے۔اِس موقعہ پر وزیر موصوف نے خطاب کرتے ہوئے کہا کہ یاترا کو روحانی اعتبار سے بہت اہمیت حاصل ہے اور یہ ملک کے مختلف علاقوں سے تعلق رکھنے والے لوگوں کے درمیان قومی یکجہتی، ثقافتی بیداری اور باہمی احترام کو فروغ دینے کا ایک مو¿ثر ذریعہ بھی ہے۔ اُنہوں نے اُمید ظاہر کی کہ عقیدت مند مکمل عقیدت کے ساتھ ا س پوترسفر کو انجام دیں گے اور برکتوں کے ساتھ واپس لوٹیں گے اور اَپنے روحانی تجربے کو تقویت بخشیں گے۔
اُنہوں نے تمام یاتریوں کے لئے محفوظ، آرام دہ اور کامیاب یاترا کی نیک خواہشات کا اظہار کیا۔ اُنہوں نے یاتراکے پُرامن اِنعقاد کو یقینی بنانے کے لئے ضروری اِنتظامات کرنے پر محکمہ کلچر اور تمام متعلقہ اداروں کی کوششوں کو بھی سراہا۔
ستیش شرما نے کہا،”سومناتھ صرف عبادت کی جگہ نہیں بلکہ یہ ہندوستان کے عقیدے، عزم و حوصلے اور شاندار تہذیبی ورثے کی ابدی علامت ہے۔ اِس طرح کے اَقدامات ہماری ثقافتی جڑوں کو مضبوط کرنے اور آنے والی نسلوں کو ہماری شاندار روایات سے جُڑے رہنے کی ترغیب دیتے ہیں۔“
اُنہوںنے جموں و کشمیر کے متنوع ثقافتی ورثے کے تحفظ اور فروغ کی اہمیت پر بھی زور دیا۔
اِس موقعہ پر پرنسپل سیکرٹری کلچر، سیکرٹری جموں و کشمیر اکیڈیمی آف آرٹ، کلچر اینڈ لنگویجز اور محکمہ کلچراور سول اِنتظامیہ کے دیگر سینئر افسران موجود تھے۔
