پریشان ہونے کی ضرورت نہیںانتظامیہ اور سکیورٹی فورسز امن برقرار رکھنے کے لیے پرعزم: لیفٹیننٹ گورنر

سرینگر،جموں و کشمیر کے لیفٹیننٹ گورنر منوج سنہا نے اتوار کے روز کہا کہ مرکز کے زیر انتظام علاقے میں عوام کو پریشان ہونے کی ضرورت نہیں ہے، انہوں نے اس بات پر زور دیا کہ انتظامیہ اور سکیورٹی فورسز امن برقرار رکھنے کے لیے پوری طرح پرعزم ہیں۔ایل جی نے کہا جموںو کشمیر میں یوٹی میں امن کو خراب کرنے والوں کے کوششوں کو کامیاب نہیں ہو نے دیا جائے گا۔کشمیر نیوز سروس ( کے این ایس ) کے مطابق ان باتوں کا اظہار انہوں نے ‘کشمیری پنڈت والنٹیرز’ (KPV) کی جانب سے منعقدہ ایک تقریب کے دوران کہی۔ اس تقریب میں بے گھر کشمیری پنڈتوں کی جانب سے وادی میں تعینات کشمیری پنڈت ملازمین کی سکیورٹی کے حوالے سے مطالبات اٹھائے گئے تھے، جن کے جواب میں انہوں نے یہ تبصرہ کیا۔یہاں منعقدہ تقریب سے خطاب کرتے ہوئے ایل جی نے کہا، "بہت سے چیلنجز ہیں، بشمول وہ جس کا آپ نے ذکر کیا۔ لیکن میرا ماننا ہے کہ اس سے بھی بڑے چیلنجز ہیں جن سے ہمیں نمٹنا ہے۔”انہوں نے کہا کہ ماضی میں سب سے بڑا چیلنج یہ تاثر تھا کہ جموں و کشمیر میں کوئی بھی قومی پرچم اٹھانے کو تیار نہیں ہوگا۔سنہا نے کہا، "لیکن آج آپ نے دیکھا ہے کہ ترنگا اٹھانے کے لیے بہت سے کندھے اور ایسے مضبوط کندھے تیار ہیں۔ آج آپ نے جو کچھ دیکھا ہے وہ اسی تبدیلی کی ایک طاقتور مثال ہے۔”جموں و کشمیر میں حالیہ دہشت گردانہ واقعات اور پرامن ماحول کو خراب کرنے کی کوششوں پر بات کرتے ہوئے، انہوں نے تسلیم کیا کہ ایسی کوششیں کی جا رہی ہیں لیکن اس بات پر زور دیا کہ لوگوں کو گھبرانے کی ضرورت نہیں ہے۔سنہا نے کہا، "ماحول کو دوبارہ خراب کرنے کی کوششیں کی جا رہی ہیں۔ پریشان ہونے کی ضرورت نہیں ہے۔ متعلقہ خدشات پر توجہ دی جا رہی ہے، اور یہ سلسلہ آج شروع نہیں ہوا بلکہ ایسی کوششیں کچھ عرصے سے جاری ہیں۔”کچھ لوگ افواہیں بھی پھیلاتے ہیں۔ میں آپ کو یقین دلاتا ہوں کہ انتظامیہ اور سکیورٹی فورسز امن برقرار رکھنے کے لیے مکمل طور پر پرعزم ہیں۔ جو بھی موجودہ امن کو خراب کرنے کی کوشش کرے گا، اسے اپنے مذموم مقاصد میں کامیاب نہیں ہونے دیا جائے گا،۔کے پی (KP) کے ایک رہنما کی جانب سے امداد میں اضافے کے مطالبے پر، ایل جی نے کہا کہ حکومت مسائل کے حل کے لیے مسلسل کوششیں کر رہی ہے۔میں پوری ذمہ داری کے ساتھ یہ کہنا چاہوں گا کہ مسئلے کا حل تلاش کرنے کی کوششیں کی گئی ہیں اور یہ کوششیں جاری ہیں۔”اگرچہ کچھ مسائل حل کیے جا سکتے ہیں، لیکن دیگر کا فوری طور پر ازالہ ممکن نہیں۔ اس کے باوجود، ان تمام معاملات کو جلد از جلد حل کرنے کی مسلسل کوششیں کی جا رہی ہیں جنہیں حل کیا جا سکتا ہے،” انہوں نے کہا۔یہ بات اس وقت سامنے آئی جب کے پی وی کے بانی وکرم کول نے اپنے خطاب میں حکومت اور لیفٹیننٹ گورنر پر زور دیا کہ وہ جموں و کشمیر کی ریاستی حیثیت بحال نہ کریں۔ انہوں نے سکیورٹی خدشات اور یونین ٹیریٹری کو درپیش چیلنجز کا حوالہ دیتے ہوئے مطالبہ کیا کہ دہشت گردانہ حملوں کے پیشِ نظر وادی میں تعینات کشمیری پنڈت ملازمین کے ماہانہ امدادی الاو¿نس میں اضافہ کیا جائے اور انہیں طویل مدتی تحفظ فراہم کیا جائے۔