عاشق کھانڈے
اونتی پورہ //مائی ٹاون مائی پرائیڈ پروگرام کے جن ابھیان کے دوسرے مرحلے کے تحت جنوبی کشمیر کے سب ضلع اونتی پورہ میں میونسپل کمیٹی کی طرف سے ٹاون ہال اونتی پورہ میں آج بھی پروگرام جاری رہا ہے جس دوران یہاں مختلف محکموں نے سٹال بھی سجائے تھے جہاں لوگوں کو سرکار کی طرف سے عملائی جا رہی مختلف سماجی و فلاحی اسکیموں سے متعلق جانکاری فراہم کی گئ۔ دریں اثنا آج میونسپل کمیٹی اونتی پورہ کی صدر شمیمہ رینہ نے آج گورنمنٹ ہائی اسکول اونتی پورہ کا دورہ کیا اور مائی ٹاون مائی پرائیڈ پروگرام کے تحت جاری کاموں کی پیش رفت کا جائزہ لیا ۔ اس موقعے پر انہوں نے اسکول احاطے میں صفائی ستھرائی کا بر سر موقع جایزہ لیا ۔ انھوں نے اسکول کے متصل پبلک پارک کا بھی جائزہ لیا اور پبلک پارک کی ناگفتہ بہ حالت پر افسوس کا اظہار کیا ۔ انھوں نے کہا کہ پبلک پارک کے ارد گرد لگائ گئ تار خستہ حالت میں پڑی ہے ۔ انہوں نے مزید کہا کہ مذکورہ پارک کی تار بندی کا کام ترجیحی بنیادوں پر شروع ہوگا ۔ انہوں نے اسکول کے ارد گرد رہنے والے لوگوں کو متنبہ کیا کہ وہ اسکول کے ارد گرد کوڑا کرکٹ ڈالنے سے احتراز کریں بصورت دیگر ان کے خلاف تحت ضابطہ کاروائی عمل میں لائی جائے گی ۔
دریں اثنا انہوں نے آج پانڈو پارک اونتی پورہ میں ایک شجر کاری پروگرام میں شرکت کرکے ماحولیات کے تحفظ کے تئیں ایک بوٹہ لگا کر شجرکاری مہم کی شروعات کی ۔
