ڈوڈہ،اونتی پورہ:۲۱، دسمبر:ضلع ڈوڈہ میں منگل کی صبح پیش آئے ایک سڑک حادثے میں میاں بیوی لقمہ اجل بن گئے ۔ادھر اونتی پورہ میں رونما ہوئے ایک سڑک حادثے میں جموں وکشمیر پولیس کاایک اہلکار اپنی جان گنوا بیٹھا۔جے کے این ایس کوملی تفصیلات کے مطابق ڈوڈہ ،بٹوٹ شاہراہ پر جاٹھی علاقے کے نزدیک ایک آلٹو کارزیر نمبرJK02cH-5892 کوڈرائیورکے کنٹرول سے باہرہوکر کئی سو فٹ گہری کھائی میں جاگری ،جس میں محکمہ فوڈ،سپلائز وامورصارفین کاایک سابق تحصیل سپلائزآفیسر62سالہ منگت رام ساکنہ چلی بھلیسہ ڈوڈہ اوراُسکی اہلیہ58سالہ شکنتلادیوی شدیدزخمی ہوگئے ۔سرکاری ذرائع نے بتایاکہ حادثے کی اطلاع ملتے ہی پولیس ٹیم وہاں پہنچی اورفوری بچاﺅ کارروائی عمل میں لاکر دونوں زخمی میاں بیوی کوGMC اسپتال ڈوڈہ منتقل کیاگیا تاہم اسپتال پہنچنے سے پہلے ہی زخمی خاتون راستے میں دم توڑ بیٹھی ۔انہوںنے کہاکہ حادثے میں زخمی ہوئے سابق ٹی ایس اﺅ کو اسپتال میں داخل کرایاگیاتاہم وہ بھی دوران علاج زخموںکی تاب نہ لاکر دم توڑ گیا۔ذرائع نے بتایاکہ پولیس نے معاملہ درج کرکے اس سڑک حادثے کی وجوہات کے بارے میں تحقیقات شروع کردی ہے ۔ذرائع نے بتایاکہ ضروری طبی وقانونی لوازمات کومکمل کرنے کے بعدمہلوک میاں بیوی کی نعشیں لواحقین کے سپردکی گئیں ۔ادھر اونتی پورہ میں رونما ہوئے ایک سڑک حادثے میں جموں وکشمیر پولیس کاایک اہلکار اپنی جان گنوا بیٹھا۔ملی تفصیلات کے مطابق ضلع پلوامہ کے اونتی پورہ علاقے میں سامبورہ کے نزدیک منگل کی صبح ایک آلٹو کار زیر نمبر JK04H-0495سڑک کنارے ایک ڈیوائڈر سے ٹکرا کراُلٹ گئی ،جسکے نتیجے میں اس میں سوار ایک پولیس اہلکار بشیر احمدکوچھے ولد غلام محی الدین ساکنہ نیگوبیروہ بڈگام شدیدزخمی ہوگیا۔ذرائع نے بتایاکہ زخمی پولیس اہلکار کوفوری طور پر ایس ڈی ایچ پانپور منتقل کیاگیاتاہم ڈاکٹروںنے ابتدائی طبی معائنے کے بعداس کو مردہ قرار دے دیا۔پولیس نے بتایاکہ ضروری طبی وقانونی لوازمات کومکمل کرنے کے بعدازجان ہوئے پولیس اہلکارکی میت آخری رسومات کی ادائیگی کیلئے لواحقین کے سپردکی گئی جبکہ اس سڑک حادثے کی مناسبت سے معاملہ درج کرکے تحقیقات شروع کردی گئی ۔
