جموں و کشمیر میں میدانی علاقوں میں شدید بارشیں

سری نگر:18،اپریل: جموں و کشمیر میں محکمہ موسمیات کی پیش گوئی کے عین مطابق منگل کی صبح سے ہی میدانی و بالائی علاقوں میں بارشوں کا سلسلہ شروع ہوا ہے جو دن بھر شدت کے ساتھ جاری ہے اس دوران جہاں میدانی علاقوں میں بارشیں ہوئی وہی دوسری جانب اونچے پہاڑوں پر ہلکی برف باری ہوئی ہے اس دوران کپوارہ اورسونہ مرگ کے بالائی علاقوں میں تازہ برف باری ہوئی ۔کشمیر نیوز سروس ( کے این ایس )کے مطابق جموں و کشمیر میں محکمہ موسمیات کی پیش گوئی کے عین مطابق منگل کی صبح سویرے سے بارشوں کا سلسلہ شروع ہوا ہے جو دن بھر جاری رہا ہے ۔اس دوران سونہ مرگ،منی مرگ اور کپوارہ کے پہاڑوں پر ہلکی برف باری کے اطلاعات موصول ہوئے ہیں ۔ محکمہ موسمیات نے منگل کو کہا کہ جموں و کشمیر میں 21 اپریل تک وقفے وقفے سے بارش اور گرج چمک کے ساتھ بارش کا امکان ہے۔محکمہ موسمیات کے ایک اہلکار نے کہا،اس دوران (18-19) گرج چمک کے ساتھ تیز ہوا (20-30 کلومیٹر فی گھنٹہ) تک پہنچ سکتی ہے اور جموں اور کشمیر کے کچھ مقامات پر ژالہ باری بھی ممکن ہے۔” انہوں نے کہا کہ 22سے 25 اپریل تک موسم "بنیادی طور پر خشک” رہنے کا امکان ہے