سری نگر:یکم جولائی:جے کے این ایس : غیرمعمولی سیکورٹی انتظامات کے بیچ 5700سے زیادہ یاتریوں کے2قافلوں کی بال تل اورنون ون سے روانگی کیساتھ ہی سالانہ امرناتھ یاترا2023کاباضابط آغاز ہوگیاجبکہ بھگوتی نگرجموں یاتری نواس سے ہفتہ کو4416یاتریوں کا قافلہ کشمیرکی جانب روانہ ہوگیا۔حکام نے بتایاکہ ابھی تک تقریباً10ہزاریاتری بال تل اور نون ون بیس کیمپوں تک پہنچ گئے ہیں ۔جے کے این ایس کے مطابق ڈپٹی کمشنر گاندربل نے ہفتہ کی صبح ضلع گاندربل کے بال تل علاقے میں قائم بیس کیمپ سے 3600یاتریوںکو جھنڈی دکھاکر امرناتھ گھپا کی جانب روانہ کیاجبکہ پہلگام کے مضافاتی میں واقع نون ون بیس کیمپ سے 2011یاتریوں کاایک اور قافلہ بھی امرناتھ گھپاکی جانب روانہ ہوگیا،اوران یاتریوں کو اعلیٰ حکام نے جھنڈی دکھاکر روانہ کیا۔بال تل گاندربل سے یاتریوں کے پہلے قافلے کی روانگی کے وقت وہاں ڈپٹی کمشنر گاندربل کے علاوہ اعلیٰ سیول وپولیس حکام اور شرائن بورڈ کے ذمہ دار بھی موجودتھے ۔ڈپٹی کمشنرگاندربل نے کہاکہ بال تل بیس کیمپ میں تقریباً7000سے8000یاتری موجود ہیں ،جن میں سے3600کے پہلے قافلے کوآج سطح سمندر سے تقریباً3880میٹر بلندی پر واقع امرناتھ گھپا کی جانب روانہ کیاگیا۔ ڈپٹی کمشنر گاندربل نے کہاکہ یاتریوں کی رجسٹریشن کاعمل جار ی ہے۔انہوںنے کہاکہ ہمارے رضاکار یاتریوں کو مدداورسہولیات پہنچانے کیلئے راستے میں جگہ جگہ موجود ہیں ۔متعلقہ ڈپٹی کمشنر نے کہاکہ راستے میں یاتریوں کیلئے جگہ جگہ کیمپ بھی لگائے گئے ہیں ،جہاں اُنھیں کھانے پینے کی سہولیات کیساتھ ساتھ ضروری طبی خدمات بھی فراہم کی جائیں گی ۔اس دوران پہلگام کے مضافاتی میں قائم نون ون بیس کیمپ سے 2011یاتریوں کا پہلا قافلہ ہفتہ کی صبح امرناتھ گھپا کی جانب روانہ ہوگیا۔اس قافلے کویہاں سے اعلیٰ حکام نے جھنڈی دکھاکرروانہ کیا۔ادھر4416 سے زیادہ یاتریوں کا دوسرا گروپ ہفتہ کو یہاں بھگوتی نگر بیس کیمپ سے م3880یٹر اونچے امرناتھ گھپاکی درشن کیلئے ایک محفوظ قافلے کے ساتھ روانہ ہوا۔بھگوتی نگر جموں بیس کیمپ سے یہ یاتری 188گاڑیوں کے قافلے میں صبح بیس کیمپ سے روانہ ہوئے۔ حکام نے بتایا کہ اس کے ساتھ ہی جموں کے بیس کیمپ سے امرناتھ غار کے لیے روانہ ہونے والے یاتریوں کی تعداد بڑھ کر 7904 ہو گئی ہے۔62 دن طویل یاترا ہفتہ کو کشمیر سے جڑواں پٹریوں پر شروع ہوئی – ضلع اننت ناگ میں روایتی48 کلومیٹر ننون،پہلگام راستہ ا وربال تل گاندربل سے 14کلومیٹر طویل راستے سے یاتری امرناتھ گھپا پہنچیں گے ۔خیال رہے سالانہ امرناتھ یاترایکم جولائی 2023کو شروع ہونے کے بعد31،اگست کو اختتام پذیر ہوگئی اور حکام کو امسال62روزہ یاترا میں 5لاکھ سے زیادہ یاتریوں کے شریک ہونے کی اُمید ہے۔یہا ں یہ بات قابل ذکر ہے کہ سالانہ امرناتھ یاترا2023کوپُرامن اوراحسن طور پر منعقد کرنے کیلئے سیکورٹی کے اضافی انتظامات کئے گئے ہیں ،اوراس مقصد کیلئے پہلے ہی مرکزی پولیس فورسزکی اضافی کمپنیوں کو کشمیر اور جموںمیں حساس علاقوں ،مقامات،شاہراہوں اورسڑکوں پر تعینات کیاگیاہے ۔
