وسطی کشمیر کے گاندربل ضلع کے ہرن گائوں میں گزشتہ ہفتے قبل اپنے کمپلیکس کے انہدام کےخلاف احتجاج کرنے کے دوران خود پر پٹرول چھڑک کر خودسوزی کرنے والا27 سالہ نوجوان11روزتک موت وحیات کی کشمکش میں مبتلاءرہنے کے بعدسنیچر کی صبح SKIMSمیں زندگی کی جنگ ہارگیا۔جے کے این ایس کے مطابق 22فروری کو وسطی کشمیر کے گاندربل ضلع کے ہرن گائوں میں اپنے کمپلیکس کی انہدامی کارروائی کے دوران مسماری ٹیم کو روکنے کے دوران کمپلیکس کے مالک عبدالحمیدشاہ کے 27سالہ بیٹے عامرحمیدنے خود پر پٹرول چھڑک کر خودسوزی کی کوشش کی ۔مذکورہ نوجوان کوجھلسی وزخمی حالت میں انسٹی چیوٹ آف میڈیکل سائنسز صورہSKIMSمنتقل کیاگیا،جہاں یہ نوجوان 11روز تک موت وحیات کی کشمکش میں مبتلاءرہنے کے بعدسنیچر کی صبح زخموں کی تاب نہ لاتے ہوئے دم توڑ گیا۔عینی شاہدین کے مطابق عامر حمیدنے کمپلیکس کی چھت پر خود کو اس وقت آگ لگا لی جب ایک انہدامی اسکاراُن کے نئے تعمیر شدہ کمپلیکس کو گرانے والا تھا۔ اس المنک واقعے کی ویڈیوز کو سوشل میڈیا پر شیئرکر نے پرایس ایس پی گاندر بل نے اُسی روزروک لگادی ۔22فروری کوپیش آئے اس المناک واقعے کے کچھ دیر بعد پولیس نے ایک بیان جاری کیا،اورکہاکہ22 فروری کو محکمہ آبپاشی اور فلڈ کنٹرول کی جانب سے نالہ سندھ کے کناروں پر مسماری مہم کے دوران، عامر حمید شاہ نامی نوجوان اچانک غیر قانونی ڈھانچے کے پیچھے سے نمودار ہوا اور کناروں پر کھڑے غیر قانونی ڈھانچے کو مسمار کرنے کے خلاف احتجاج کرتے ہوئے اس کی چھت پر خود سوزی کرلی۔ڈویڑنل انتظامیہ نے پہلے ہی واقعے کی وقتی تحقیقات کا حکم دے دیا ہے۔22 فروری کو ضلع گاندربل میں مبینہ خود سوزی کے افسوسناک واقعہ کی میڈیا رپورٹس کا نوٹس لیتے ہوئے ڈویڑنل کمشنرکشمیر پی کے پولے، خورشید احمد شاہ نے تحقیقاتی احکامات صادر کرتے ہوئے ایڈیشنل ڈسٹرکٹ ڈیولپمنٹ کمشنر، گاندربل کو ایک انکوائری افسر کے طور پر مقرر تاکہ اس پورے معاملے کی انکوائری عمل میں لائی جا سکے۔صوبائی کمشنر کشمیر نے واقعے سے متعلق انکوائری کی رپورٹ10 دنوں میں حتمی تبصرے وسفارشات کیساتھ طلب کی ۔دریں اثناءسنیچر کی صبح جب27سالہ خوبرؤ نوجوان عامر حمید شاہ کی موت آبائی علاقہ ہرن کنگن گاندربل پہنچی تو پورا علاقہ دم بخود ہوکر رہ گیا،وریہاں صف ماتم بچھ گیا۔بڑی تعدادمیں گاؤں والے ،دوست واحباب یہاں جمع ہوئے اورسنیچر کوبعددوپہرعامرحمید کی تجہیزوتکفین میں لوگوںکی ایک بڑی تعدادنے شر کت کی ۔
