شوپیاں کے چیک چھوٹی پورہ علاقے میں رخصت پر آئے مقامی سی آر پی ایف اہلکار پر مشتبہ جنگجووں نے فائرنگ کی جس کے نتیجے میں اُس کی موقع پر ہی موت واقع ہوئی۔ پولیس ذرائع نے اسکی تصدیق کرتے ہوئے بتایا کہ آس پاس علاقوں کو محاصرے میں لے کر حملہ آوروں کی بڑے پیمانے پر تلاش شروع کی گئی ہے۔ یو پی آئی کے مطابق ہفتے کی شام کو شوپیاں کے چیک چھوٹی پورہ گاؤں میں اُس وقت سنسنی کا ماحول پھیل گیا جب مشتبہ جنگجووں نے رخصت پر گھر آئے سی آر پی ایف اہلکار جس کی شناخت مختیاراحمد کے بطور ہوئی پر نزدیک سے گولیاں چلائیں جس کے نتیجے میں وہ شدید طورپر زخمی ہوا۔ انہوںنے بتایا کہ زخمی اہلکار کو علاج ومعالجہ کی خاطر فوری طورپر نزدیکی ہسپتال لے جایا گیا تاہم وہاں پر موجود ڈاکٹروں نے اُسے مردہ قرار دیا۔ پولیس نے آس پاس علاقوں کو محاصرے میں لے کر حملہ آوروں کی بڑے پیمانے پر تلاش شروع کی ہے۔ یو پی آئی نے اس ضمن میں جب شوپیاں پولیس کے ساتھ رابط قائم کیا تو انہوںنے اس بات کی تصدیق کی کہ چھوٹی پورہ شوپیاں میں مقامی سی آر پی ایف اہلکار کو ابدی نیند سلا دیا گیا ہے۔ انہوںنے کہا کہ سیکورٹی فورسز نے حملہ آوروں کی تلاش شروع کی ہے۔
