پونچھ، 4 نومبر: پونچھ میں ڈی کے جی روڈ پر واقع بفلیاز علاقے میں جمعہ کو مٹی کا تودہ گرنے سے ایک 40 سالہ خاتون اور اس کی 12 سالہ بیٹی کی موت ہو گئی اور ان کے خاندان کے دو مرد افراد زخمی ہو گئے۔
سرکاری ذرائع نے بتایا کہ مٹی کا تودہ صبح کے وقت آیا جس نے محمد لطیف نامی شہری کے گھر کو بہا لے گیا، جس کے نتیجے میں اس کی بیوی نسیم اختر (40) اور ان کی بیٹی روبینہ کوثر (12) موقع پر ہی لقمہ اجل بن گی۔ انہوں نے بتایا کہ اس واقعے میں لطیف اور اس کا بیٹا بشارت زخمی ہوئے۔
واقعے کی خبر کے فوراً بعد مقامی لوگوں، پولیس اور فوج کے 48 آر آر نے کمپنی کمانڈر کیپٹن امندیپ کی قیادت میں بڑے پیمانے پر بچاؤ آپریشن شروع کیا۔ زخمیوں کو اسپتال میں داخل کرایا گیا ہے اور ان کی حالت مستحکم بتائی جاتی ہے۔
ایس ایچ او سورنکوٹ راجویر سنگھ نے جی این ایس کو اس افسوسناک واقعے میں ماں بیٹی کی موت کی تصدیق کی۔ انہوں نے کہا کہ واقعہ کے سلسلے میں مقدمہ درج کر لیا گیا ہے۔
