نیوز ڈیسک
پلوامہ: جنوبی کشمیر کے اونتی پورہ علاقے میں بدھ کو سینٹرل ریزرو پولیس فورس (سی آر پی ایف) کے 130 بٹالین نے اپنے ہیڈکوارٹر میں ایک گیس ایجنسی کا افتتاح کیا۔ "شہید راجندر کمار ناین گیس ایجنسی” کے نام سے اس ایجنسی کا افتتاح انسپکٹر جنرل آف سی آر پی ایف، ایم ایس بھاٹیہ نے کمانڈنگ آفیسر 130 بٹالین اور دیگر سی آر پی ایف افسران کی موجودگی میں کیا۔ اس موقع پر آئی جی بھاٹیہ نے میڈیا کے ساتھ بات کرتے ہوئے کہا کہ ایجنسی کو دور دراز مقامات پر سی آر پی ایف کے جوانوں کی تعیناتی اور بدلتے ہوئے موسمی حالات کے پیش نظر قائم کیا گیا، کیونکہ ایجنسی ان کی روزمرہ کی کھانا پکانے کی سرگرمیوں کو آسان بنائے گی۔ انہوں نے کہا کہ اسی طرح کی ایجنسیاں جنوبی کشمیر کے دیگر سی آر پی ایف کیمپوں کے ساتھ ساتھ کشمیر کے باقی حصوں میں بھی شروع کی جائیں گی۔ بھاٹیہ کا مزید کہنا تھا کہ یہ پہل سی آر پی ایف جوانوں کی بہبودی کے لئے شروع کی گئی ہے۔
