سید اعجاز/کے این ایس
سری نگر، 28 اپریل: ڈائریکٹر انفارمیشن جموں و کشمیر منگا شیرپا نے جمعہ کو کہا کہ وہ محکمہ میں اپنے پیشروؤں کے ذریعہ کئے گئے عظیم کام کو آگے بڑھانے کی کوشش کریں گے۔ڈائریکٹر انفارمیشن جموں و کشمیر کے عہدے کا چارج سنبھالنے کے فوراً بعد کشمیر نیوز سروس (کے این ایس) سے خصوصی گفتگو کرتے ہوئے، منگا شیرپا نے کہا کہ وہ مرکز کے زیر انتظام علاقے میں میڈیا برادری کے حوالے سے مسائل کو حل کرنے کی کوشش کریں گے۔انہوں نے کہا کہ ہمارے پیش ورؤں نے جو بھی کام کیا ہے، اسے آگے بڑھانے کی کوشش کریں گے اور تمام اسٹیک ہولڈرز کے ساتھ مل کر کام کریں گے۔
منگا شیرپا کو جمعرات کو لیفٹیننٹ گورنر سیکرٹریٹ میں ایڈیشنل سیکرٹری کے طور پر تعینات ہونے کے بعد ڈائریکٹر انفارمیشن جموں و کشمیر کے عہدے کا اضافی چارج دیا گیا تھا۔سینٹ سٹیفن کالج اور جواہر لعل نہرو یونیورسٹی کے سابق طالب علم، شیرپا AGMUT کیڈر کے 2017 بیچ کے IAS افسر ہیں۔شیرپا کو جموں و کشمیر ٹورازم ڈیولپمنٹ کارپوریشن کے منیجنگ ڈائریکٹر کے عہدے کا اضافی چارج بھی سونپا گیا ہے۔
