کپوارہ،سری نگر:۳،مئی : شمالی کشمیر کے سرحدی ضلع کپواڑہ کے مژھل سیکٹر میں سرحدپار سے دراندازی کی ایک کوشش کوناکام بناتے ہوئے فوج نے کہاکہ LOCکے نزدیک واقع پنجاد علاقے میں جھڑپ کے دوران2عدم شناخت شدہ ملی ٹنٹ مارے گئے ،جن کی نعشوں اور ہتھیار وگولی بارودکو جائے جھڑپ سے برآمد کیاگیا۔فوج نے کہاکہ اس علاقے میں ممکنہ طور پرمزید ملی ٹنٹوںکے چھپے ہونے کے پیش نظرتلاشی آپریشن جاری رکھاگیا ہے ۔جے کے این ایس کے مطابق پولیس نے ایک بیان میں کہاکہ سرحدی ضلع کپواڑہ کے مژھل سیکٹرکے پنچاد علاقہ میں ملی ٹنٹوں اور سیکورٹی فورسز کے درمیان شروع ہونے والی گولی باری میں2ملی ٹنٹ مارے گئے۔پولیس نے مزید بتایا کہ ملی ٹنٹوں کی موجودگی کی اطلاع ملنے کے بعد پولیس اور فوج کی ایک مشترکہ ٹیم نے علاقے میں آپریشن شروع کیا۔انہوں نے کہا کہ جب فورسز کی مشترکہ ٹیم نے مشتبہ مقام کی تلاشی میں تیزی لائی تو ملی ٹنٹوں نے پارٹی پر فائرنگ کی جس پرجوابی کارروائی کی گئی جس کے نتیجے میں یہاں انکاو¿نٹر شروع ہوگیا۔انہوں نے کہا کہ فائرنگ کے تبادلے کے دوران2ملی ٹنٹ ہلاک ہوگئے جبکہ علاقے میں آپریشن جاری ہے۔ادھر سری نگرمیں تعینات پی آر او (دفاع) نے مژھل سیکٹرمیں ہوئی خونین جھڑپ کے بارے میں ایک بیان جاری کیا ۔انہوںنے کہاکہ لائن آف کنٹرول کے پار سے مژھل سیکٹر کی طرف دہشت گردوں کے لانچنگ پیڈز میں سے ایک سے ممکنہ دراندازی کے بارے میں ایس ایس پی کپواڑہ کے فراہم کردہ ایک مخصوص انٹیلی جنس ان پٹ کی بنیاد پر، فوجیوں کو یکم مئی سے ہی ہائی الرٹ پر رکھا گیا تھا۔پی آر او (دفاع) سری نگر نے کہا کہ اس ناہموار اور انتہائی دشوار گزار علاقے میں ایک اچھی طرح سے مربوط کاو¿نٹر انفلٹریشن گرڈ لگایا گیا تھا۔ دراندازی کے ممکنہ راستوں پر ہندوستانی فوج اور ایس او جی کپواڑہ سمیت متعدد اضافی گھات لگائے گئے تھے۔ گھات لگا کر بیٹھنے والے چوکس فوجیوں نے لگاتار دو راتوں تک مسلسل بارش، خراب نمائش اور درجہ حرارت میں نمایاں کمی کی وجہ سے مسلسل خراب موسم کا مقابلہ کیا۔پی آر او (دفاع) سری نگر نے کہا کہ3 مئی کی صبح تقریباً ساڑھے8 بجے، دہشت گردوں کو فوج نے لائن آف کنٹرول کی اپنی طرف دراندازی کرتے ہوئے ٹھکانے لگایا۔ شدید فائرنگ کا تبادلہ ہوا جس کے نتیجے میں2 دہشت گرد مارے گئے۔انہوںنے کہاکہ مارے گئے دونوں دہشت گردوں کی لاشوں کے ساتھ اے کے47 سیریز کی2 رائفلیں، 6میگزین، اے کے47کی159گولیاں ،پاکستانی مارکنگ کے ساتھ کھانے کی اشیاءاور سگریٹ کے علاوہ پاکستانی کرنسی کے660روپے برآمدکئے گئے۔ علاقے کی مزید وسیع تلاش جاری ہے۔پی آر او (دفاع) سری نگر نے کہا کہ دہشت گردوں اور اس سے منسلک دہشت گرد گروپ کی شناخت کی جا رہی ہے۔ انٹیلی جنس پر مبنی یہ کامیاب آپریشن ہندوستانی فوج، جموں وکشمیرپولیس اور تمام ایجنسیوں کے درمیان قریبی ہم آہنگی کی ایک اور مثال ہے۔ سیکورٹی فورسز علاقے کے امن اور ہم آہنگی کو درہم برہم کرنے کےلئے ہمارے مخالف کی حمایت یافتہ دشمن عناصر کے مذموم عزائم کو ناکام بنانے کے لیے ثابت قدم ہیں۔
