سری نگر:۴۱،جون :جے کے این ایس : لیفٹیننٹ گورنر منوج سنہا نے بدھ کوضلع گاندربل کے بال تل علاقے کا دورہ کیا اور بال تل کے راستے سے شری امرناتھ جی کی سالانہ یاترا کی تیاریوں کی صورتحال کا جائزہ لیا۔جے کے این ایس کے مطابق لیفٹیننٹ گورنر منوج سنہا نے سائٹ پر معائنہ کرنے سے پہلے، سونہ مرگ میں ایک جائزہ میٹنگ ہوئی جس میں چیف ایگزیکٹو افسرامرناتھ شرائن بورڈ ڈاکٹر مندیپ کمار بھنڈاری، کمشنر/ سیکریٹری دیہی ترقی اور پنچایتی راج مندیپ کور، اے ڈی جی پی کشمیر وجے کمار،، ڈویڑنل کمشنر کشمیروجے کمار بدھوری اور شری امرناتھ جی شرائن بورڈ، سول انتظامیہ، پولیس، سی اے پی ایف اور فوج کے سینئر افسران نے شرکت کی ۔لیفٹیننٹ گورنر نے صحت کی دیکھ بھال، بجلی، مواصلات، پانی کی فراہمی اور صفائی ستھرائی، موسم کی پیشن گوئی، ڈیزاسٹر مینجمنٹ، سیکورٹی گرڈ اور یاتریوں کے لیے دیگر تمام بنیادی ضروریات کے لیے کیے گئے انتظامات کا جائزہ لیا۔انہوں نے عہدیداروں کو ہدایت دی کہ یاترا بیس کیمپ میں ڈاکٹروں، عملہ، آلات، ادویات اور آکسیجن سلنڈر کی مناسب تعداد کو یقینی بنایا جائے۔ بی آر اﺅ کو وسائل کو متحرک کرنے اور یاترا کے آغاز سے پہلے تمام کام مکمل کرنے کی ہدایت دی گئی۔لیفٹیننٹ گورنر نے کہا کہ چونکہ یاترا اونچائی پر دشوار گزار علاقے میں ہے جہاں آکسیجن کی سطح کم ہے، صحت کی سہولیات، چوبیس گھنٹے دیکھ بھال کو یقینی بنایا جانا چاہیے۔منوج سنہا نے عہدیداروں پر زور دیا کہ وہ یاترا روٹ اور رات کی فضائی خدمات پر مواصلاتی خدمات کو یقینی بنائیں۔ انہوں نے مزید ہدایت کی کہ خیمہ بستیوں میں آگ بجھانے کے آلات نصب کئے جائیں۔انہوںنے کہاکہیاترا کے مجموعی انتظامات کو اپ گریڈ کر دیا گیا ہے۔ تمام متعلقہ محکمے یاتراکو آسان، محفوظ اور پریشانی سے پاک بنانے کے لئے ضروری اقدامات کریں۔بالتال میں یاترا بیس کیمپ میں، لیفٹیننٹ گورنر نے ڈی آر ڈی او کے اسپتال میں جاری کام اور یاتریوں کے لیے دیگر سہولیات کا معائنہ کیا۔اُنھیںبتایا گیا کہ ہسپتال کو17 جون تک فعال کر دیا جائے گا۔سیکرٹری ٹورازم ڈیپارٹمنٹ ڈاکٹر سید عابد رشید شاہ ، سکریٹری پلاننگ، ڈیولپمنٹ اینڈ مانیٹرنگ ڈیپارٹمنٹ ڈاکٹر راگھو لینگر اور ایس شیامبیر، ڈپٹی کمشنر گاندربل بھی موجود تھے۔
