سری نگر:۸، جولائی: : محکمہ موسمیات نے جموں وکشمیرمیں 14جولائی تک موسمی صورتحال جوںکی توں رہنے کی پیش گوئی کرتے ہوئے خبردار کیاکہ موسلا دار بارشوں کے نتیجے میں نشیبی علاقوں میں عارضی طور پر پانی جمع ہونے کیساتھ ساتھ معمولی سیلابی صورتحال پیداہوسکتی ہے جبکہ اس دوران سیلابی ریلوں ،مٹی کے تودے اور پتھر گرآنے کی وجہ سے سری نگر جموں قومی شاہراہ،سری نگر لیہہ شاہراہ اورمغل روڑ کے علاوہ دیگر پہاڑی راستوں پرٹریفک کی نقل وحمل میں عارضی یاجزوقتی خلل پڑ سکتاہے ۔محکمہ موسمیات نے آبی ذخائر کے قریب واقع علاقوں کے لوگوںکو الرٹ رہنے کابھی مشورہ دیا۔جے کے این ایس کے مطابق سری نگرمیں قائم ہندستانی محکمہ موسمیات کے علاقائی مرکز میں تعینات ڈپٹی ڈائریکٹر ڈاکٹر مختار احمد نے ہفتہ کو دن کے ایک بجکر45منٹ پر تازہ موسمیاتی جانکاری یاایڈوائزری جاری کی ،جس میں انہوںنے کہاکہ آج یعنی ہفتہ کو جموں وکشمیرمیں تیز ہوائیں چلنے اور بجلی کڑکنے کے بیچ بیشتر مقامات پر وقفے وقفے سے ہلکی سے درمیانی درجے کی بارش کا امکان ہے۔انہوںنے کہاکہ جموں ڈویڑن اور کشمیر ڈویڑن میں الگ تھلگ مقامات پر موسلادھار سے بہت زیادہ بارش ہونے کابھی امکان ہے۔ڈاکٹر مختار نے مزید کہاکہ 29جولائی کوجموں وکشمیرمیں بیشتر مقامات پر وقفے وقفے سے ہلکی سے درمیانی بارش کا امکان ہے جبکہ جموں ڈویڑن کے الگ تھلگ مقامات پر موسلادھار بارش کا امکان ہے۔محکمہ موسمیات کے ڈپٹی ڈائریکٹر کاکہناتھاکہ 10سے14جولائی تک جموں وکشمیر میں مطلع ابرآلودرہنے کے بیچ شام یا صبح کے وقت کچھ جگہوں پر وقفے وقفے سے گرج چمک کے ساتھ بارش ہوسکتی ہے۔انہوںنے کہاکہ بارشوں کے رواں سلسلے کی وجہ سے دریاﺅں اورندی نالوں کے قریب واقع علاقوں کے لوگ الرٹ رہیں کیونکہ سیلابی ریلے ، مٹی کے تودے گرآنے،زمین کھسکنے کے واقعات پیش آسکتے ہیں۔انہوںنے ساتھ ہی کہاکہ موسلا دار بارشوں کی وجہ سے نشیبی علاقوں میں عارضی طور پر پانی جمع ہونے کیساتھ ساتھ معمولی سیلابی صورتحال بھی پیداہوسکتی ہے ۔ ڈپٹی ڈائریکٹر ڈاکٹر مختار احمد کامزید کہناتھاکہ مسلسل بارشوںکی وجہ سے مٹی کے تودے اور پتھر گرآنے نیز زمین کھسک جانے کی وجہ سے سری نگر جموں قومی شاہراہ،سری نگر لیہہ شاہراہ اورمغل روڑ کے علاوہ دیگر پہاڑی راستوں پرٹریفک کی نقل وحمل میں عارضی یاجزوقتی خلل پڑ سکتاہے ۔انہوںنے لوگوںکو مشورہ دیاکہ وہ بجلی کڑکنے کے دوران گھروں کے اندر رہیں۔ماہر موسمیات ڈاکٹر مختار نے کشمیر وادی کے کچھ اونچے مقامات پر ہلکی برف باری ہونے کابھی امکان ظاہر کیا۔