بشارت رشید
سرینگر: اپنی زندگی میں کئی مشکلات کا مقابلہ کرتے ہوئے، سرینگر جموں کشمیر کی ایک خصوصی طور پر معذور خاتون، سمارٹی جی نے اپنی قوت ارادی، لگن اور محنت کے ساتھ شہر کے کھنموہ علاقے میں اسپائس پروسیسنگ پلانٹ قائم کیا ہے۔ مزکورہ لڑکی نے نہ صرف خود کو، بلکہ دوسروں کو بھی بااختیار بنا رہی ہے۔ سمارٹی نے حال ہی میں سرینگر شہر کے کھنموہ پنتھہ چوک علاقے میں اپنا مصالحہ جات کا پلانٹ لگایا ہے، جہاں اب وہ دس کے قریب افراد کو روزگار دے رہی ہے، جب کہ اس پلانٹ میں کام کرنے والے ملازمین وہاں کے ورک کلچر سے کافی مطمئن ہیں۔ وہیل چیئر پر پابند ہونے کے باوجود بھی، سمارٹی خود اپنے پلانٹ کے ارد گرد کے مجموعی کام کی نگرانی کرتی ہے۔ سرینگر میل کے ساتھ ایک انٹرویو کے دوران انہوں نے اپنے برانڈ کو فروغ دینے میں حکومت سے تعاون کی مانگ کی ہے۔ اس کے علاوہ سمارٹی نے خصوصی طور پر معذور افراد سے محنت اور لگن کے ساتھ آگے بڑھنے کی اپیل کی ہے، اور کہا کہ وہ اپنے یونٹس قائم کرکے خود مختار بنیں۔ انہوں نے مزید کہا کہ گھر میں وقت ضائع کرنے سے ان کو کچھ حاصل نہیں ہوگا۔
