ہم مضبوط معیشت کے ساتھ آگے بڑھ رہے ہیں ،وہ دن دور نہیں جب بھارت سرفہرست تین معیشتوں میں شامل ہوگا

سرینگر/17اکتوبر/ا وزیر اعظم نریندر مودی نے منگل کے روز کہا کہ وہ دن دور نہیں جب ہندوستان سرفہرست تین عالمی معیشتوں میں شامل ہوگا۔ سٹار نیوز نیوٹ ورک کے مطابق وزیر اعظم نے کہا کہ بھارت تیزی کے ساتھ ترقی کی طرف بڑھ رہا ہے اور ہم ایک مضبوط معیشت کے ساتھ آگے آئیں گے ۔ انہوں نے مزید کہا کہ ہر کوئی ہندوستان کی طرف اس امید پر دیکھ رہا ہے کہ وہ ایک نئے عالمی نظام کی کوششوں کی قیادت کرے گا۔منگل کو قومی دارالحکومت میں تین روزہ گلوبل میری ٹائم انڈیا سمٹ کا افتتاح کرتے ہوئے پی ایم مودی نے کہا”اس بدلتے ہوئے عالمی نظام میں، پوری دنیا نئی امنگوں کے ساتھ ہندوستان کی طرف دیکھ رہی ہے۔ ہندوستانی معیشت مزید مضبوط ہو رہی ہے جبکہ وہ دن دور نہیں جب ہندوستان دنیا کی تین بڑی معاشی طاقتوں میں سے ایک ہو گا“۔ملک کے بحری شعبے کی اہمیت کو اجاگر کرتے ہوئے پی ایم مودی نے کہا”تاریخ گواہ ہے کہ جب بھی ہندوستان کی بحری صلاحیت مضبوط رہی ہے، ملک اور دنیا نے اس سے بہت فائدہ اٹھایا ہے۔ اس کو اپنے رہنما اصول کے طور پر لیتے ہوئے، ہم نے اس میں کام کیا ہے۔ اس شعبے کو مضبوط کرنے کے لیے گزشتہ 9 سالوں سے منصوبہ بندی کی گئی ہے“۔وزیر اعظم مودی نے مزید کہا کہ ہندوستان مشرق وسطی یورپ اقتصادی راہداری کے لاگو ہونے کے بعد سمندری صنعت کو فروغ ملے گا۔حال ہی میں G20سربراہی اجلاس کے دوران، ہندوستان-مشرق وسطی-یورپ اقتصادی راہداری کی تشکیل پر ایک تاریخی اتفاق رائے پایا گیا۔ یہ ہندوستان کی پہل پر ایک بہت بڑا قدم ہے، جو 21ویں صدی میں پوری دنیا میں سمندری صنعت کو ممکنہ طور پر زندہ کر سکتا ہے۔انہوں نے 18,800 کروڑ روپے کے پروجیکٹوں کا سنگ بنیاد بھی رکھا۔انہوں نے ٹونا ٹیکرا ہر موسم کے گہرے ڈرافٹ ٹرمینل کا سنگ بنیاد رکھا، جو 4500کروڑ روپے سے زیادہ کی لاگت سے تعمیر ہونا ہے۔انہوں نے ہندوستانی سمندری نیلی معیشت کے لئے ‘امرت کال وڑن 2047’ کی بھی نقاب کشائی کی۔سمٹ ملک میں منعقد ہونے والا سب سے بڑا میری ٹائم ایونٹ ہے۔ پہلی میری ٹائم انڈیا چوٹی کانفرنس 2016 میں ممبئی میں ہوئی تھی جبکہ دوسری عملی طور پر 2021 میں منعقد ہوئی تھی۔تیسری چوٹی کانفرنس 17 سے 19 اکتوبر تک ممبئی کے ایم ایم آر ڈی اے گراونڈز میں ہوگی۔تین روزہ سربراہی اجلاس میں مستقبل کی بندرگاہوں سمیت میری ٹائم سیکٹر کے اہم امور پر تبادلہ خیال اور غور کیا جائے گا۔وزیر اعظم نے کہا کہ ملک اگلے پچیس برسوں تک اختراعی کوششوں میں کافی حد تک کامیاب ہوگا جو اس کو اول نمبر پر آنے میں معاون ثابت ہوگا۔