سرینگر/17اکتوبر جموں و کشمیر وقف بورڈ کی چیئرپرسن اور ریاستی وزیر ڈاکٹر درخشاں اندرابی نے پیر دستگیر صاحب ؒ کے سالانہ عرس کے انتظامات کے سلسلے میں سری نگر انتظامیہ کے ساتھ آج جائزہ میٹنگ کی صدارت کی۔ یہ میٹنگ وقف مرکزی دفتر سرینگر میں منعقد ہوئی جس میں سرینگر انتظامیہ، سری نگر میونسپل کارپوریشن، کے پی ڈی سی ایل، جل شکتی، سرینگر پولیس، ٹریفک پولیس، ریجنل ٹرانسپورٹ آفس، فائر اینڈ ایمرجنسی سروس، ہیلتھ سروسز، آر اینڈ بی اوروقف بورڈ کے متعلقہ افسران نے شرکت کی۔ ڈاکٹر اندرابی نے خانیار اور صورہ میں درگاہ دستگیر صاحب کے فول پروف انتظامات کو یقینی بنانے کے لیے وقف بورڈ کے نوڈل رول کے ساتھ تمام محکموں کی مربوط کوشش پر زور دیا۔ بہت نتیجہ خیز بحث ہوئی اور تمام محکموں کے کام کو بہتر طریقے سے چلانے کے لیے ایک روڈ میپ کو حتمی شکل دی گئی۔ ڈاکٹر اندرابی نے کہاکہ پہلے وقف سیاسی جماعتوں اور سیاسی خاندانوں کے ساتھ مل کر کام کرتا تھا اور اب ہم تمام متعلقہ محکموں کے ساتھ تال میل میں کام کر رہے ہیں تاکہ لوگوں کو مطلوبہ سہولیات مل سکیں”، ڈاکٹر اندرابی نے کہاکہ یہ دیکھ کر بہت اچھا لگا کہ لوگ اب ہمارے تمام اقدامات میں وقف بورڈ کے ساتھ تعاون کر رہے ہیں۔ ڈاکٹر اندرابی نے لوگوں کو عرس دستگیر صاحب کی مبارکباد دی۔ اس موقعے پر انہوں نے تمام متعلقہ اداروں کو ہدایت دی کہ وہ عرس مبارک کے سلسلے میں ذائرین کےلئے ہر طرح کی سہولیات کو بہم رکھنے کےلئے اقدامات اُٹھائیں۔ خاص کر خانیار اور دستگیر صاحب امیرا کدل کے آستان میں حاضری دینے والے ذائرین کےلئے ٹرانسپورٹ کی سہولیات بہم رکھنے کی بھی ہدات دی ۔
