سری نگر13 دسمبر ,ڈویژنل کمشنر کشمیر وجے کمار بدھوری نے بدھ کے روز کہا کہ سری نگر میں شروع کیے گئے فلائی اوورز پر کام کی رفتار کو تیز کر دیا گیا ہے اور امید ہے کہ 2024 کے وسط تک بمنہ اور سنت نگر فلائی اوور کو کھلا اور عوام کے لیے وقف کر دیا جائے گا۔کشمیر نیوز سروس ( کے این ایس ) کے مطابق انہوں نے کہا "اگر آپ سری نگر فلائی اوور پر کام دیکھیں گے تو شروع کیے گئے کام کی رفتار تیز ہو گئی ہے۔ حکام کام کے عمل پر گہری نظر رکھے ہوئے ہیں اور امید ہے کہ بمنہ اور سنت نگر فلائی اوور 2024کے وسط تک عوام کے لیے وقف کر دیے جائیں گے،” ڈویڑنل کمشنر کشمیر نے منگل کے روز بتایا۔بوٹینگو فلائی اوور پر، ڈویژنل کمشنر کشمیر نے کہا کہ مذکورہ فلائی اوور پر کام بھرپور طریقے سے کیا گیا ہے اور امید ہے کہ نیشنل ہائی ویز اتھارٹی آف انڈیا (NHAI) اس سال کے آخر تک اس پر دو طرفہ ٹریفک کی اجازت دے گی۔15نومبر کی ڈیڈ لائن تھی لیکن کچھ رکاوٹوں کی وجہ سے وہ پوری نہیں ہو سکی۔ اب مسائل کو حل کر لیا گیا ہے اور NHAI کو 31 دسمبر سے مذکورہ فلائی اوور پر دو طرفہ ٹریفک کی اجازت دینے کا امکان ہے۔
