جموں/ 24جنوری2024ئچنئی میں جاری کھیلو انڈیا یوتھ گیمز 2024 کے دوران جمناسٹکس میں جموں و کشمیر کی اُبھرتی ہوئی سٹار مسکان رانا نے جموں و کشمیر یوٹی کے لئے ایک طلائی ، دو چاندی اور ایک کانسے کا تمغہ حاصل کے پانچ تمغے جیتے ہیں ۔ سپورٹس کونسل کی جمناسٹک اکیڈیمی سے تعلق رکھنے والی جمناسٹ مسکان رانا نے جموںوکشمیر کا نام روشن کیا۔ جموںوکشمیر سپورٹس کونسل نے جموں و کشمیر میں اِس اولمپک کھیل کو فروغ دینے کے لیے متعدد اَقدامات شروع کئے ہیں۔ جموں کے ایم اے سٹیڈیم میں قائم سپورٹس کونسل جمناسٹک اکیڈمی جدید ترین اور عالمی معیار کے بنیادی ڈھانچے سے لیس ہے۔ اَرجن ایوارڈ یافتہ کروپالی سنگھ اس اکیڈمی کے اعلیٰ کارکردگی والے کوچوںمیں سے ایک ہیں۔ وہ اور دیگر کوچ باقاعدگی سے جدید سائنسی اور پیشہ ورانہ خطوط پر مبنی تربیت فراہم کرتے ہیں۔
سپورٹس اَتھارٹی آف اِنڈیا نے اِس اکیڈمی کو قومی شہرت کی کھیلو اِنڈیا اکیڈمی فار جمناسٹک کے طور پر تسلیم کیا ہے اور اِس اکیڈمی کے کھلاڑیوں نے قومی اور بین الاقوامی مقابلوں میں قابل ستائش کارکردگی کا مظاہرہ کیا ہے۔ گزشتہ دو برسوں میں اِس اکیڈمی کے زیر تربیت اَفرادنے نیشنل گیمز،کھیلو اِنڈیا یوتھ گیمزاورنیشنل چمپئن شپ میں 8 گولڈ، 15 سلور اور 9 کانسے کے تمغے حاصل کئے ہیں۔
اِس کے علاوہ 11 کھلاڑیوں نے بین الاقوامی مقابلوں میں ملک کی نمائندگی کی ہے ۔ بولین کور، مسکان رانا، جاگرتی ٹھاکر، ویبھاوی شرما، مانیا، ستوتی گپتا، سنیہا دیوان، ویمنی ڈوگرہ، وندنا بھارتی، گورو چھیتری، یادوی مہاجن، مانو گپتا، لکشیا مہاجن، ساحل ساہی، کمل دیپ سنگھ، اندردیپ سنگھ ، مینک جین ، سدیپتی کھنہ ، رودرکش کھنہ، ایمن ٹاک، پرانوی شرما، اکشرا شرما، ریا شرما، ٹریزا بلال، پراچی شرما، شرانیا شرما، ہرگن کور جموں و کشمیر سپورٹس کونسل کی جمناسٹک اکیڈمی سے باقاعدگی سے تربیت حاصل کرنے والے ہیں۔
جموں و کشمیر جمناسٹوں کی کارکردگی اور کامیابیوں میں نمایاں اضافہ ہوا ہے اور اُنہوں نے بین الاقوامی معیار کے آلات کی دستیابی کی وجہ سے متعدد تمغے جیتے ہیں۔ اُنہوں نے قومی اور بین الاقوامی مقابلوں جیسے ورلڈ اور ایشین چمپئن شپ میں بھی مختلف سطحوں پر ناقابل یقین حد تک اچھی کارکردگی کا مظاہرہ کیا ہے۔ گزشتہ کھیلو اِنڈیا گیمز کے دوران تربیت حاصل کرنے والی مسکان رانا اور باولین کور دونوں نے 2021 ءاور 2022 ءمیں ہندوستان کے بہترین جمناسٹ ٹائٹل جیتنے کے ساتھ ساتھ جموں و کشمیر کے لئے تمغے بھی جیتے تھے۔
اِس برس ایک بار پھر مسکان رانا نے مانیا، وابھوی شرما اور جاگرتی ٹھاکر کے ساتھ بنگلورو میں حال ہی میں منعقدہ جونیئر نیشنل چمپئن شپ میں ٹیم چمپئن شپ جیتنے کے علاوہ سینئر ٹیم نے جموںوکشمیر یوٹی کے لئے چاندی کا تمغہ جیتا۔
