الیکشن کمیشن آف انڈیا نے بھاجپا ،اپنی پارٹی ،پیوپلزکانفرنس،ڈی پی اے پی اورکچھ آزاد اُمیدواروں کی جانب سے دائر کردہ درخواستوں میں اُبھارے گئے تحفظات سے اتفاق کرتے ہوئے اننت ناگ ،راجوری پارلیمانی نشست کیلئے 7مئی2024کوتیسرے مرحلے میں ہونے والے عام انتخابات کوملتوی کرتے ہوئے نئی تاریخ کااعلان کردیا ۔جے کے این ایس کے مطابق الیکشن کمیشن آف انڈیاکی جانب سے 30اپریل کو جاری بیان میں کہاگیاکہ 12اپریل کو اننت ناگ راجوری لوک سبھا سیٹ کیلئے نوٹیفکیشن جاری کی گئی تھی ،جسکی رﺅ سے اس پارلیمانی نشست کیلئے انتخابات کے تیسرے مرحلے میں 7مئی کو ووٹنگ ہونا تھی ۔کمیشن نے کہاکہ موسمی صورتحال ابتر ہونے نیز مختلف اضلاع تک پہنچنے میں درپیش دشواریوں کے باعث اُمیدواروں کی انتخابی مہم اثرا نداز ہونے کیساتھ ساتھ انتخابات سے متعلق اہم سامان مختلف علاقوں تک پہنچانے میں بھی مشکلات درپیش ہیں ۔اسلئے 7مئی کوہونے والے ملتوی کئے جاتے ہیں ،اور اب اننت ناگ ،راجوری لوک سبھا سیٹ پر انتخابات کے چھٹے مرحلے میں 25مئی 2024کو ووٹ ڈالے جائیں گے۔خیال رہے اس نشست کیلئے این سی کے میاں الطاف ،پی ڈی پی کی محبوبہ مفتی اور اپنی پارٹی کے ظفر منہاس سمیت2درجن اُمیدواروں نے کاغذات نامزدگی جمع کرائے ہیں ،اور اب اس سیٹ کیلئے انتخابات کا نیا شیڈول جاری ہونے کے بعد مزید اُمیدواراپنے کاغذات نامزدگی داخل کرسکتے ہیں ،اور غالب امکان ہے کہ بھاجپا بھی اس اہم نشست کیلئے اب اپنا اُمیدوار میدان میں اُتارے گی ۔