سری نگر/10 جولائی2024ئلیفٹیننٹ گورنر منوج سِنہا نے آج راج بھون میں”کشمیر میراتھن“ کے اِفتتاحی ایڈیشن کی تیاریوں کا جائزہ لینے کے لئے ایک میٹنگ کی صدارت کی۔میٹنگ میں چیف سیکرٹری اَتل ڈولو، لیفٹیننٹ گورنر کے پرنسپل سیکرٹری ڈاکٹر مندیپ کمار بھنڈاری ، کمشنر سیکرٹری محکمہ سیاحت یشامدگل اور دیگر سینئراَفسران نے شرکت کی۔ لداخ میراتھن کے بانی اور ریس ڈائریکٹر پدم شری چیوانگ موٹوپ گوبا نے بھی میٹنگ میں شرکت کی۔میٹنگ میں اَکتوبر میں سری نگر میں منعقد ہونے والے ایونٹ کے لئے روڈ میپ ، ٹائم لائنز اور پروموشنل حکمت عملی پر تبادلہ خیال ہوا۔لیفٹیننٹ گورنر نے جموں و کشمیر کو عالمی سیاحتی نقشے پر لانے اور جموں وکشمیر یوٹی کو ایڈونچر سیاحت کے لئے ایک مثالی مقام اور پروگراموں کے مرکز کے طور پر ترقی دینے کے لئے یو ٹی اِنتظامیہ کے عزم کا اعادہ کیا۔اُنہوںنے کہا کہ جب ہم اس میراتھن پروگرام کا اِنعقاد کریں گے تو دُنیا کی نظریں جموں و کشمیر پر ہوں گی اور لوگوں بالخصوص تجارت اور سیاحت سے وابستہ اَفراد کو ہندوستان اور بیرون ملک کے شرکا¿ کے سامنے اَپنی منفرد ثقافت اور گرمجوشی سے مہمان نوازی پیش کرنے کا موقعہ ملے گا۔”کشمیر میراتھن “کا بنیادی مقصد بین الاقوامی سطح پر جموں و کشمیر کی صلاحیتوں کو ظاہر کرنا اور ماحول دوست سیاحت کو فروغ دینا اور صحت اور تندرستی کی حوصلہ افزائی کرنا ہے۔ کشمیر کے بھرپور ورثے اور قدرتی خوبصورتی کی نمائش کے علاوہ مقامی کمیونٹیوں کو فخر اور اپنائیت کے احساس کو فروغ دینے کے لئے ایونٹ کی منصوبہ بندی اور اسے چلانے میں بھی شامل کیا جائے گا۔ ہندوستان اور بیرون ملک کے دوڑنے والوں سے دو دوڑ میراتھن ( 42کلومیٹر ) اور ہاف میراتھن ( 21کلومیٹر ) میں حصہ لینے کی اُمید ہے۔
