جموں/12 جولائی2024ئپرنسپل سیکرٹری محکمہ زرعی پیداوار شیلندر کمار نے اے پی ڈی کے مختلف جاری ترقیاتی پروجیکٹوں کے تحت حاصل کی گئی پیش رفت کا جائزہ لینے کے لئے ایک میٹنگ کی صدارت کی۔ میٹنگ میں مالی سال 2024-25 ءکے لئے جے کے سی آئی پی کی تفصیلی پروجیکٹ رپورٹس (ڈی پی آر) کا جائزہ لینے کے علاوہ جامع زرعی ترقیاتی پروگرام (ایچ اے ڈِی پی)، کیپکس اور مرکزی معاونت والی سکیموں (سی ایس ایس) کے تحت حاصل کردہ طبعی اور مالیاتی سنگ میل کا جائزہ لینے پر توجہ مرکوز کی گئی۔میٹنگ میں ڈائریکٹر اینمل ہسبنڈری جموں، منیجر فروزن سیمن بینک جموں، چیف مویشی پروری اَفسران اور دیگر متعلقہ افسران نے شرکت کی۔پرنسپل سیکرٹری نے اَفسروں سے خطاب کرتے ہوئے ڈیری اور پولٹری سیکٹر کی ترقی کو فروغ دینے میں ان منصوبوں کی اہمیت پر زور دیا تاکہ پورے خطے میں دیہی معاش میں اِضافہ کیا جاسکے۔ اُنہوں نے افسران سے کہاکہ وہ مقررہ وقت کے اندر اہداف کے حصول کے لئے پُرعزم رہیں اور مختص وسائل کے زیادہ سے زیادہ اِستعمال کو یقینی بنائیں۔ اُنہوں نے ان سے کہاکہ وہ ان منصوبوں پر جاری کاموں میں تیزی لائیں تاکہ کسان کمیونٹی کو فوائد فراہم کئے جاسکیں۔
