سری نگر/چیف سیکرٹری اَتل ڈولو نے آج محکمہ سکولی تعلیم کی ایک اعلیٰ سطحی جائزہ میٹنگ کی صدارت کی جس میں تعلیمی منظرنامے، تدریسی معیار اور جاری اصلاحاتی اقدامات کا تفصیلی جائزہ لیا گیا۔میٹنگ میں سیکرٹری محکمہ سکولی تعلیم، پروجیکٹ ڈائریکٹر سماگراہ شکھشا، ڈائریکٹر سکولی تعلیم کشمیر و جموں، سیکرٹری جے کے بی او ایس اِی سمیت دیگر متعلقہ افسران نے شرکت کی۔اِس موقعہ پر چیف سیکرٹری نے سرکاری سکولوں میں معیاری تعلیم کی فراہمی پر زور دیتے ہوئے کہا کہ محکمہ کو اپنے سالانہ بجٹ جو کہ تقریباً 11,000 کروڑ روپے ہے، کے مطابق تعلیمی نتائج بھی یقینی بنانے ہوں گے۔اُنہوں نے اساتذہ کے کردار کو کلیدی قرار دیتے ہوئے کہا ،”جب تک اساتذہ اپنی ذمہ داریاں مو¿ثر انداز میں ادا نہیں کرتے، کوئی بھی بنیادی ڈھانچہ یا تکنیکی بہتری فائدہ مند ثابت نہیں ہو سکتی۔“ اُنہوں نے مزید کہا کہ تدریس میں اساتذہ کی لگن اور تخلیقی صلاحیت کا کوئی نعم البدل نہیں۔
