سری نگر /محکمہ ہینڈی کرافٹس و ہینڈ لومز کشمیر کی جانب سے قومی ہینڈ لوم ڈے کے موقعہ پرمنعقدہ ”ٹرینی پروڈکٹ سیل“ کو زبردست اور شاندار عوامی پذیرائی حاصل ہوئی جس کے پیش نظر محکمہ رواں ماہ 20 سے 27 اگست تک کشمیر ہاٹ جسے نمائش گاہ بھی کہا جاتا ہے ، میں’ گاندھی شلپ بازار‘ کا اِنعقاد کر رہا ہے۔محکمہ کے مختلف تربیتی مراکز میںبدھ کے روز بڑی تعداد میں لوگ کشمیر ہاٹ پہنچے جہاں تربیت یافتہ کاریگروں کی تیار کردہ ہینڈلوم اور ہینڈی کرافٹس اشیاءخام مال کی لاگت پر فروخت کی گئیں۔بڑے پیمانے پر’ کارپٹ سکیم‘ کے مراکز میں ہاتھ سے بنے ہوئے رنگ برنگے اونی قالین بہت کم وقت میں فروخت ہو گئے جن کی مجموعی فروخت تقریباً 5 لاکھ روپے ریکارڈ کی گئی۔ محکمہ کے ترجمان نے بتایا،”محکمہ نے عوامی جوش و خروش کو مدنظر رکھتے ہوئے اِنڈین انسٹی چیوٹ آف کارپٹ ٹیکنالوجی (آئی آئی سی ٹی)سری نگر میں تربیت یافتہ کاریگروں کی تیار کردہ مصنوعات کی نیلامی کا فیصلہ کیا ہے جہاں ریشم اور اون دونوں قسم کے قالین سب سے زیادہ بولی لگانے والے کو فروخت کئے جائیں گے۔“
