سرینگر//مفتی ناصر الاسلام کی قیادت میں متحدہ مجلس علماء(ایم ایم یو) نے ہفتے کے روز کشمیر بھر کے ہوٹلوں اور ریستورانوں کے مالکان سے اپیل کی ہے کہ وہ جموں و کشمیر کے باہر سے درآمد کردہ ذبح شدہ مرغیوں اور گوشت کی مصنوعات کی خرید، فروخت یا پیش کرنے سے روک دیں، اور ان پر زور دیا کہ وہ ایسی اشیاءمقامی طور پر خریدیں۔کشمیر نیوز سروس ( کے این ایس ) کے مطابق یہ اپیل گرینڈ مفتی ناصر الاسلام کی سربراہی میں سرینگر میں منعقدہ متحدہ مجلس علمائے کرام کی ایک میٹنگ کے دوران سامنے آئی، جہاں سینئر علماءاور مشائخ نے وادی میں سپلائی کی جانے والی ذبح شدہ مرغی کے معیار اور ذرائع پر تشویش کا اظہار کیا۔مفتی ناصر الاسلام نے کہا کہ یہ فیصلہ متعدد شکایات اور ان پٹ موصول ہونے کے بعد کیا گیا ہے جس میں بتایا گیا ہے کہ مرکزی زیر انتظام علاقہ کے باہر سے آنے والے ذبح شدہ چکن میں سے زیادہ تر حلال معیارات پر پورا نہیں اترتے۔ہوٹیلرز سے اپیل کی گئی ہے کہ وہ صارفین کو ذبح شدہ مرغیوں کی خرید، سپلائی اور فروخت بند کردیں۔ ریسٹورنٹ مالکان اور مہمان نوازی کے شعبے سے وابستہ افراد کو مشورہ دیا جاتا ہے کہ وہ بیرونی ذرائع سے ذبح شدہ مرغیاں منگوانا بند کریں اور اس کے بجائے مقامی طور پر مرغی خریدیں۔انہوں نے مزید زور دیا کہ یہ کمیونٹی کی اجتماعی ذمہ داری ہے کہ وہ اس بات کو یقینی بنائے کہ وادی میں صرف حلال گوشت اور مرغی کا استعمال اور پیش کیا جائے۔ انہوں نے کہا کہ "حرام گوشت خریدنا بند کریں اور مقامی طور پر گوشت اور چکن خریدیں۔ یہ ایک مذہبی اور اخلاقی ذمہ داری ہے۔اجلاس میں مقامی حکام پر زور دیا گیا کہ وہ پولٹری اور گوشت کی سپلائی چینز کی نگرانی کریں تاکہ اسلامی غذائی قوانین کی پابندی کو یقینی بنایا جا سکے اور حلال فوڈ کے شعبے میں مصروف مقامی پروڈیوسرز کی مدد کی جا سکے۔
