سرینگر: 6 فروری
جموں و کشمیر کے ضلع اودھم پور میں ہفتے کو ایک المناک سڑک حادثے میں دو مسافر لقمہ اجل جبکہ دو دیگر زخمی ہوگئے ۔سرکاری ذرائع نے بتایا کہ اودھم پور کے تھنڈا پڈر علاقے میں شاہراہ پر ہفتے کے روز ایک گاڑی سڑک پر لڑھک گئی جس کے نتیجے میں اس میں سوار چار مسافر زخمی ہوگئے ۔انہوں نے کہا کہ زخمیوں کو فوری طور نزدیکی ہسپتال منتقل کیا گیا جہاں ان میں سے دو مسافر زخموں کی تاب نہ لا کر دم توڑ گئے ۔متوفین کی شناخت 26 سالہ ابھے اور 23 سالہ دیوم کے بطور ہوئی ہے جبکہ زخمیوں کی شناخت 24 سالہ ہریش اور 25 سالہ پارس کے بطور کی گئی ہے ۔ذرائع کے مطابق زخمیوں کو گورنمنٹ میڈیکل کالج جموں ریفر کیا گیا ہے ۔ ادھر جموں وکشمیر کے گرمائی دارلخلافہ سری نگر کی معروف پارمپورہ فروٹ منڈی کے نزدیک ہفتے کی صبح کو شاہراہ پر تعینات دو فوجیوں کوتیز رفتار ٹرک نے زور دار ٹکر ماری جس وجہ سے دونوں شدید طورپر زخمی ہوئے اور بعد میں ایک اہلکار کی ہسپتال میں موت واقع ہوئی۔ذرائع نے بتایا کہ پارمپورہ سری نگر میں ہفتے کی صبح 163ٹریٹوریل آرمی سے وابستہ اہلکار شاہراہ کا جائزہ لے رہے تھے کہ اسی اثنا میں ایک تیز رفتار ٹرک نے دو اہلکاروں کو زور ددار ٹکر ماری ۔معلوم ہوا ہے کہ خون میں لت پت اہلکارو ں کو علاج ومعالجہ کی خاطر نزدیکی ہسپتال منتقل کیا گیا تاہم ڈاکٹروں نے سنجے کمار نامی فوجی اہلکار کو مردہ قرار دیا ۔حادثے میں زخمی ہوئے دوسرے اہلکار کی شناخت رفیق احمد کے بطور ہوئی ہے ۔پولیس ذرائع نے بتایا کہ ڈرائیور جائے موقع سے فرار ہوا ہے تاہم ٹرک زیر نمبر (JKO3J /3811)کو تحویل میں لے کر مفرور ڈرائیور کی تلاش شروع کی گئی ہے ۔
