سرینگر،یکم نمبر (کے این ایس): موسمیاتی مرکز سری نگر (MeT) نے جموں و کشمیر کے لیے موسم کی پیشن گوئی اور ایڈوائزری جاری کی ہے، جس میں اگلے چند دنوں کے دوران بنیادی طور پرموسم خشک رہنے کی پیش گوئی کی گئی ہے، جس کے بعد اگلے ہفتے مرکز کے زیر انتظام علاقوں کے کچھ حصوں میں بارش اور برف باری کا مختصر سلسلہ ہوگا۔کشمیرنیوز سروس ( کے این ایس ) کے مطابق جموں اور کشمیر دونوں صوبوں میں یکم سے3 نومبر تک موسم عام طور پر خشک رہے گا۔تاہم، 4 اور 5 نومبر کو، خطے میں عام طور پر ابر آلود موسم دیکھنے کا امکان ہے اور 4 نومبر کی شام اور رات کے دوران بکھرے ہوئے مقامات پر ہلکی بارش یا اونچائی پر ہلکی برفباری کا امکان ہے اور یہ 5 نومبر کی صبح یا دوپہر تک جاری رہے گا۔پیشن گوئی مزید بتاتی ہے کہ عام طور پر6 سے 13 نومبر تک موسم دوبارہ خشک رہے گا، جس میں کوئی خاص بارش کی توقع نہیں ہے۔اپنی ایڈوائزری میں، محکمہ موسمیات نے خبردار کیا ہے کہ 4 نومبر کی شام کو چند مقامات پر گرج چمک، آسمانی بجلی اور تیز ہوائیں چل سکتی ہیں۔موسم میں تبدیلی کے بعد چند ایک مقامات پر5نومبر کے بعد درجہ حرارت میں مزید کمی آ سکتی ہے کاشتکاروں کو مشورہ دیا گیا ہے کہ وہ 4اور 5نومبر کو کھیتی باڑی کے کام کو روک دیں تاکہ موسم سے متعلق کسی بھی نقصان سے بچا جا سکے۔
