نیوز ڈیسک
پانپور: کسان شرامک سورکشا یوجنا جموں کشمیر نے ہفتے کو پانپور علاقے کے ستپوکھرن کھریو میں بیداری و تقسیم کاری کیمپ کا انعقاد کیا، جس میں بڑی تعداد میں مقامی لوگوں نے شرکت کی۔ مذکورہ یوجنا کے عہدیداروں، بلاک کارڈنیٹروں کے علاوہ اس پروگرام میں ایس ایچ او کھریو منظور احمد، بی ڈی سی پانپور میر الطاف اور دیگر کئی افراد نے شرکت کی۔ اس موقعے پر لوگوں کو یوجنا کے ذریعے شروع کی گئی مختلف فائدہ مند اسکیموں کے بارے میں آگاہ کیا گیا، جبکہ علاقے کے لوگوں کے لئے مفت میڈیکل کیمپ کا بھی انعقاد کیا گیا۔ اس کے علاوہ شرکاء کو فوڈ کٹس اور اسٹیشنری کا سامان بھی دیا گیا۔ ایک عہدیدار کے مطابق کسان شرامک یوجنا کینسر اور گردے کے مریضوں کو بھی پانچ ہزار روپئے نقد دے رہی ہے- انہوں نے مزید کہا کہ مستقبل میں بھی یوجنا کی جانب سے اس طرح کے کئی اور کیمپ بھی منعقد کئے جائیں گے۔ یوجنا سے وابستہ ملازمین نے مستحق لوگوں سے اپیل کی ہے کہ وہ کسان شرامک کارڈ بنا کر یوجنا کی تمام اسکیموں کا فائدہ اٹھائیں۔
