بانہال:۱۲، فروری:سری نگر جموں قومی شاہراہ پیر کی شب سے منگل کی سہ پہرتک مسلسل بند تھی ،جسکے نتیجے میں اس شاہراہ پر ہزاروں کی تعدادمیں چھوٹی بڑی مسافر ومال بردار گاڑیاں ،ان میں سوار ڈڑائیوروں،کنڈکٹروں اور مسافروں سمیت2متوفین کی نعشیں بھی درماندہ پڑی ہیں ۔جے کے این ایس کوملی تفصیلات کے مطابق پیرکوشام دیر گئے رام بن اوربانہال کے درمیان شیربی بی علاقے میں نزدیکی پہاڑ سے پسیاں اور مٹی کے تودے گرآنے کاسلسلہ دوبارہ شروع ہوگیا،جسکے بعدقومی شاہراہ پرٹریفک کی نقل وحمل روک دی گئی ۔ٹریفک پولیس کے ذرائع نے بتایاکہ شیربی بی کے علاوہ کچھ دیگر مقامات پر بھی پسیاں،پتھر اور مٹی کے تودے گرآنے کاسلسلہ جاری رہا،جس کی وجہ سے شاہراہ پر بحالی کاکام متاثر رہا۔لوگوں کے مطابق رام بن اور بانہال کے درمیان قومی شاہراہ مسلسل دوسرے روز بند رہنے کی وجہ سے دونوں اطراف ہزاروںکی تعدادمیںچھوٹی بڑی مسافر ومال بردار گاڑیاں ،ان میں سوار ڈڑائیور،کنڈکٹر اور مسافردرماندہ ہوکررہ گئے ہیں ،اورسبھی لوگ شاہراہ کے کھلنے کا بے صبری سے انتظار کررہے ہیں ۔معلوم ہواکہ قومی شاہراہ بندہونے سے چندی گڑھ سے کپوارہ اور جموں سے کوکرناگ منتقل کی جارہی 2افرادکی متیں بھی درماندہ ایمبولنس گاڑیوں میں پڑی ہیں۔حکام نے بتایاکہ ان ایمبولنس گاڑیوںکونکالنے کی کوششیں جاری ہیں تاکہ دونوں نعشوں کوجلدسے جلد آبائی علاقوںمیں پہنچایا جاسکے۔اُدھر جے اینڈکے ٹریفک پولیس کی جانب سے سری نگر جموں قومی شاہراہ کی تازہ صورتحال کے حوالے سے منگل کی صبح ایک کے بعدایک ٹویٹس میں صورتحال کی جانکاری دی گئی ۔ٹریفک پولیس نے منگل کی شام تقریباً4بجے ایک تازہ ٹویٹ میں لکھاکہ شالگڈی بانہال میں بھاری لینڈ سلائیڈنگ کا سلسلہ جاری ہے۔ آج قومی شاہراہ پر سنگین صورتحال جاری ہے۔ لوگوں کو مشورہ دیا گیا ہے کہ وہ سری نگر جموں قومی شاہراہپر سفر کرنے سے گریز کریں۔
