سرینگر: ڈائریکٹر سکول ایجوکیشن کشمیر تصدق حسین نے جمعرات کو کہا کہ محکمہ جاری امتحانات کے اختتام پر نئے تعلیمی سیشن کے آغاز کے لیے پوری طرح تیار ہے۔یہاں ایک تقریب کے موقع پر میڈیا سے گفتگو کرتے ہوئے تصدق حسین نے کہا کہ نئی تعلیمی سرگرمیاں سالانہ جاری امتحانات کے اختتام کے فوراً بعد شروع کی جائیں گی کیونکہ ہم نے پہلے ہی اپنی نظر میں ایک ٹائم لائن مقرر کر رکھی ہے۔کشمیر نیوز سروس ( کے این ایس ) مطابق انہوں نے کہا کہ زمینی عملہ تمام ضروری طریقوں کے ساتھ تیار ہے۔نجی اداروں کی طرف سے سالانہ فیس وصول کرنے کے بارے میں پوچھے جانے پر حسین نے کہا کہ لوگوں کو ہمیں اس کی اطلاع دینے کی ضرورت ہے اور ہم اس کے مطابق کارروائی شروع کریں گے۔ انہوں نے کہا کہ "جہاں سے بھی ہمیں کسی بھی نجی ادارے کے سالانہ فیس لینے کے بارے میں کوئی تحریری شکایت موصول ہوگی، ہم ایسے اداروں کے خلاف ضرور سخت کارروائی کریں گے”۔ڈائریکٹر نے یہ بھی واضح کیا کہ ابھی تک سری نگر کا کوئی کوچنگ سنٹر ان (DSEK) کے ساتھ رجسٹرڈ نہیں ہے۔انہوں نے کہا کہ "ہم نے یہاں سری نگر میں کوئی کوچنگ سنٹر رجسٹر نہیں کیا ہے اور نہ ہی ہم نے کوئی فیس مقرر کی ہے”۔ انہوں نے کہا کہ کوچنگ سنٹر من مانی طریقے سے چلائے جا رہے ہیں اور مالکان بھی اپنے طور پر فیس وصول کر رہے ہیں۔
