بشارت رشید
اونتی پورہ: جموں کشمیر رورل لائیولی ہوڈ مشن نے نیشنل بینک فار ایگریکلچر اینڈ رورل ڈیولپمنٹ کے اشتراک سے چرسو اونتی پورہ پلوامہ کشمیر میں قومی شاہراہ پر پہلے رورل مارٹ کا افتتاح کیا ہے۔ اس موقعے پر نیشنل بینک فار ایگریکلچر اینڈ رورل ڈیولپمنٹ (نابارڈ) کے چیف جنرل منیجر ڈاکٹر اے کے سود، اے ڈی سی اونتی پورہ ظفر حسین شال،اور ‘نابارڈ’ کے ڈی جی ایم سریندر سنگھ نے اس مارٹ کا مشترکہ طور پر افتتاح کیا۔ تفصیلات کے مطابق مزکورہ بینک نے اپنی ایک اسکیم کے تحت پلوامہ میں کلسٹر لیول فیڈریشن آف سیلف ہیلپ گروپس کو نیشنل ہائی وے پر ایک رورل مارٹ قائم کرنے اور چلانے کے لیے تین سال تک 5 لاکھ 93 ہزار روپے کی گرانٹ سپورٹ فراہم کی ہے، جس سے ان کی فروخت اور خریداری میں آسانی ہوگی۔ ایک عہدیدار کے مطابق مارٹ کا مقصد سیلف ہیلپ گروپس کی جانب سے تیار کی گئی مقامی دستکاری کی اشیاء، کپڑے، ہینڈلوم، خوراک، ڈرائی فروٹ اور دیگر اشیاء کی مارکیٹنگ کے لیے پلیٹ فارم فراہم کرنا ہے. شرکاء سے خطاب کرتے ہوئے، ایڈیشنل ڈپٹی کمشنر، اونتی پورہ، ظفر حسین شال نے کہا ہے کہ یہ دیہی مارٹ ضلع میں خواتین کو بااختیار بنانے کی طرف پہلا قدم ہے، جبکہ ڈاکٹر سود نے خواتین سیلف ہیلپ گروپ اراکین کی حوصلہ افزائی کی اور کہا کہ وہ مارٹ کو معاشی ترقی کے ایک موقع کے طور پر استعمال کریں۔
