کولگام میں مسلح افراد کا حملہ، سرپنچ ہلاک

جنوبی کشمیر کے ضلع کولگام کے آڈورہ علاقے میں مشتبہ جنگجووں نے ایک سرپنچ کو گولی مار کر ہلاک کر دیا ہے۔سرکاری ذرائع نے بتایا کہ مشتبہ جنگجو وں نے جمعے کی شام کو کولگام کے آڈورہ علاقے میں سرپنچ شبیر احمد میر ولد محمد عبدا للہ میر پر اپنے گھر کے نزدیک سے گولیاں چلائیں جس کے نتیجے میں وہ شدید طورپر زخمی ہو گئے۔انہوں نے کہا کہ زخمی سرپنچ کو فوری طور پر نزدیکی ہسپتال لے جایا گیا جہاں ڈاکٹروں نے انہیں مردہ قرار دے دیا۔ہسپتال ذرائع نے یو این آئی اردو کو بتایا کہ سرپنچ کے جسم میں کئی گولیاں پیوست تھیں جس کے نتیجے میں اْس کی موقع پر ہی موت واقع ہوئی تھی۔سیکورٹی ذرائع نے بتایا کہ علاقے کو محاصرے میں لیکر تلاشی آپریشن شروع کیا گیا ہے۔ تاہم بظاہر حملہ آور فرار ہونے میں کامیاب ہوچکے ہیں۔ادھر بی جے پی کے ترجمان الطاف ٹھاکر نے یو این آئی اردو کو بتایا کہ مہلوک سرپنچ بی جے پی کے ساتھ وابستہ نہیں تھا اور اس ضمن میں پھیلائی جانے والی افواہیں حقیقت سے بعید ہے۔انہوں نے کہا کہ ایک دفعہ پھر ملی ٹینٹوں نے عوامی نمائندے کو بے دردی کے ساتھ قتل کیا جس کی جتنی بھی مذمت کی جائے کم ہے۔قابل ذکر ہے کہ 9 مارچ کی شام کو مشتبہ ملی ٹینٹ کھنموہ سری نگر میں سرپنچ سمیر احمد بٹ کے رہائشی مکان میں زبردستی گھس آئے اوراندھا دھند فائرنگ شروع کی جس کے نتیجے میں سرپنچ کی موقع پر ہی موت واقع ہوئی تھی۔قبل ازیں مشتبہ جنگجووں نے دو ہفتے قبل ضلع کولگام میں ہی ڈپٹی سرپنچ پر نزدیک سے گولیاں چلائیں جو بعد میں ہسپتال میں دم توڑ بیٹھا۔وادی کشمیر میں مختلف سیاسی جماعتوں کے لیڈران اور کارکنوں کی شکایت ہے کہ انہیں سیکورٹی فراہم نہیں کی جارہی ہے۔ بعض کی یہ بھی شکایت ہے کہ ان کے ساتھ سیکورٹی اہلکار مامور تھے لیکن پی ڈی پی – بی جے پی اتحاد ختم ہونے کے بعد ان سے یہ سیکورٹی واپس لی گئی۔ادھر جنوبی ضلع پلوامہ کے چیوا کلان علاقے میں جمعے کی شام کو سیکورٹی فورسز اور جنگجووں کے مابین گولیوں کا تبادلہ ہوا ہے۔سرکاری ذرائع نے بتایا کہ حفاظتی عملے کو یہ اطلاع موصول ہوئی کہ ملی ٹینٹ جنوبی ضلع پلوامہ کے چیوا کلان علاقے میں چھپے بیٹھے ہیں تو پولیس اور سیکورٹی فورسز نے مشترکہ طور پر فوراً اس علاقے کو محاصرے میں لے لیا اور اْنہیں ڈھونڈ نکالنے کے لئے کارروائی شروع کی۔انہوں نے بتایا کہ فرار ہونے کے تمام راستے مسدود پا کر ملی ٹینٹوں نے حفاظتی عملے پر اندھا دھند فائرنگ شروع کی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا اور اس طرح سے طرفین کے مابین جھڑپ شروع ہوئی۔اْن کے مطابق سیکورٹی فورسز نے آس پاس علاقوں کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔ذرائع نے بتایا کہ علاقے میں دو جنگجو پھنس کر رہ گئے ہیں جنہیں مار گرانے کی خاطر اضافی کمک کو طلب کیا گیا۔مقامی ذرائع کا کہنا ہے کہ علاقے میں شدید گولیوں کا تبادلہ جاری رہنے سے لوگ گھروں میں سہم کر رہ گئے ہیں۔اس سلسلے میں مزید تفصیلات کا انتظار ہے۔