سید اعجاز
سری نگر:24،دسمبر//پلوامہ ضلع کے شاہورہ علاقہ میں محفل بہار ادب شاہورہ ، محکمہ یوتھ سروسز اینڈ سپورٹس اور ضلع انتظامیہ کے اہتمام سے شاہ ظہورسپورٹس سٹیڈیم تملہ ہال پلوامہ میں شاہورہ ٹی20ناک آوٹ کرکٹ ٹورنامنٹ جاری ہے۔ ٹورنامنٹ میں پلوامہ اور شاہورہ تحصیلوں کی 24ٹیمیں حصہ لے رہی ہیں۔ شاہ ظہور اسٹیدیم تملہ ہال میں کھیل شائقین لطف اندوز ہورہے ہیں کیونکہ علاقہ میں اس طرح کاایک جامع ٹورنامنٹ پہلی بار ہورہا ہے۔سٹیڈیم میں جہاں کھلاڑی ،شائقین کھیل اور علاقہ کے لوگوں کی ایک بڑی تعداد موجودرہتی ہے وہیں کچھ نیوز پورٹلوں اورسماجی رابطہ گاہوں کی طرف سے میچوں کی براہ راست نشریات سے ہزاروں کی تعداد میں لوگ لطف اندوز ہورہے ہیں ۔25اکتوبر سے شروع ہوئے ٹورنامنٹ میں آج تک درجنوں میچ کھیلئے گئے جن میں علاقہ شاہورہ اور پلوامہ کی کئی نامی گرامی کرکٹ ٹیموں نے حصہ لیا ۔ٹورنامنٹ کا افتتاح ضلع ترقیاتی کونسل کے چیرمین سید باری اندرابی نے افسران اور علاقہ کی معزز شخصیات کی موجودگی میں کیاجس دوران کھلاڑیوں ، کھیل شائقین اور علاقہ کے لوگوں کی ایک بڑی تعداد موجود تھی جبکہ ٹورنامنٹ کا افتتاحی میچ ایس جے سی سی تملہ ہال اور ٹہاب ٹائیگرس کے درمیان کھیلا گیا جو کہ تملہ ہال نے جیت لیا۔اس کے اگلے روزپہلا مقابلہ نیلورہ اور بٹ نور کے درمیان ہوا جو نیلورہ نے جیت لیا ۔دوسرامیچ چند گام اور نائرہ کے مابین ہوا جو چندگام نے جیت لیا ۔ ٹورنامنٹ کا اہم میچ جمہ خانہ پلوامہ اور ینگ بائز لتر کے درمیان کھیلا گیا جو جمہ خانہ پلوامہ نے جیت لیا ۔اس کے علاوہ ٹورنامنٹ میں گابر پورہ ،مژپونہ ،اچھن ،الائی پورہ ،چڈرن ،ذاسو ،چکورہ دیہات کی ٹیموں نے اچھی کار کردگی کا مظاہرہ کیا۔ علاقہ میںزیر تعمیر شاہ ظہور سپورٹس اسٹیڈیم کے قیام سے نہ صرف پلوامہ بلکہ شوپیاں ضلع کے کھیل شائقین نے مسرت کا اظہار کرتے ہوئے ضلع انتظامیہ پلوامہ اور جموں و کشمیر سپورٹس کونسل سے مذکورہ اسٹیڈیم میں بنیادی سہولیات جن میں کھلاڑیوں کیلئے بیٹھنے کی جگہ ،ٹیموں کو درکار ضروری کھیل سامان کے ساتھ ساتھ اسٹیڈیم میں ڈرسنگ روم کے تعمیراور میٹ کے فوری انتظام کا مطالبہ کیاہے ۔عوامی حلقوں نے محفل بہار ادب شاہورہ ، محکمہ یوتھ سروسز اینڈ سپورٹس اور ضلع انتظامیہ کی سراہنا کرتے ہوئے اس طرح کی کھیل سرگرمیوں کو جاری رکھنے کی اپیل کی ہے ۔یہاں یہ بات قابل ذکر ہے کہ معروف کشمیری شاعر ،خوشنویس اورسرکردہ سماجی کارکن مرحوم غلام بنی شاہ ظہور کے نام سے منسوب اسٹیڈیم کے قیام پر سماجی ،ادبی اورعوامی حلقوںانتہائی مسرت کا اظہار کیا اور یہ مانگ دہرائی ہے کہ علاقہ شاہورہ میں مذکورہ شاعر کے نام پر مزید سرکاری اداروں کا قیام عمل میں لایا جائے ۔
