سری نگر،بارہمولہ:۱۱، فروری:سرکاری وکاہچرائی اراضی کوبحال کرنے کی مہم کے بیچ آبی ذخائر کوغیرقانونی تجاوزات سے نجات دلانے کی کارروائی بھی شروع کردی گئی ہے ،اوراس حوالے سے سری نگر میونسپل کارپوریشن اور محکمہ آبپاشی اور فلڈ کنٹرول ڈویژن بارہمولہ نے دودھ گنگا نالہ،دریاکناروں اور دیگرآبی ذخائر پر مبینہ طورقابض لوگوں کوتجاوزات ہٹانے کیلئے7دنوںکی آخری مہلت دی ہے۔جے کے این ایس کے مطابقسری نگرمیونسپل کارپوریشن کے کمشنراطہرعلی خان نے 11فروری2023کوجاری کردہ ایک نوٹس زیر نمبرSMC/PS/COM/120-27میں کہاہے کہ سری نگرمیں آلوچی باغ سے چھتہ بل تک دودھ گنگا نالہ کےساتھ غیر قانونی تجاوزات کرنے والے اپنی تعمیرات وتجاوزات کو 7 دنوں کے اندر ہٹائیں۔انہوںنے کہاکہ دودھ گنگا نالے کی حدودمیں کئی مقامات پر ناجائز تجاوزات کوپایاگیاہے،اور یہاں غیرقانو نی تعمیرات کھڑی کی گئی ہیں۔کمشنر ایس ایم سی اطہرعلی خان نے کہاکہ عام نوٹس کے ذریعے دودھ گنگا کی اراضی پر غیرقانونی تجاوزات وتعمیرات کھڑی کرنے والوںکو7دنوںکی مہلت دی جاتی ہے کہ وہ ناجائز تجاوزات اور تعمیرات کوازخودہٹادیں اور ایسا نہ کرنے کی صورت میں SMCکارروائی شروع کرے گی۔انہوںنے کہاکہ آلوچی باغ سے چھتہ بل تک دودھ گنگا نالہ کےساتھ غیر قانونی تجاوزات کوہٹانے کی کارروائی کے اخراجات خلاف ورزی کرنے والوںکو ادا کرنا ہوں گے۔ادھر جاری انسداد تجاوزات مہم کے بیچ محکمہ آبپاشی اور فلڈ کنٹرول ڈویژن بارہمولہ نے ہفتے کے روز ایک نوٹس جاری کرتے ہوئے دریاکناروں اور دیگرآبی ذخائر پر مبینہ طورقابض لوگوں کوتجاوزات ہٹانے کیلئے7دنوںکی آخری مہلت دی ہے۔ اسسٹنٹ ایگزیکٹوانجینئر محکمہ آبپاشی اور فلڈ کنٹرول ڈویژن بارہمولہ کے دفتر سے11فروری2023کوایک نوٹس زیر نمبرFCSDB/122-38 بعنوان ’ہرخاص وعام‘ جاری کی گئی ۔اس نوٹس کے ذریعے محکمہ آبپاشی اور فلڈ کنٹرول ڈویڑن نے بارہمولہ ضلع میں رہائشیوں سے کہا ہے کہ وہ 7 دنوں کے اندر دریائے جہلم کے کناروں اور دیگر آبی ذخائر پر سے غیر قانونی تجاوزات کو ہٹا دیں،اوراگرکوئی تعمیر کھڑی کی گئی ہے تو مقررہ معیادمیں اسکو دورکریں۔محکمہ ھٰذا نے اس آخری مہلت سے انتباہ کیاہے کہ ایسا نہ کرنے پر تجاوزات کرنے والوں کے خلاف سخت کارروائی کی جائے گی۔نوٹس میں خبردار کیاگیا ہے کہ اگر کوئی شخص تجاوزات کو ہٹانے میں ناکام ہوتا ہے تو، محکمہ آبپاشی اور فلڈ کنٹرول ڈویژن بارہمولہ انسدادتجاوزات کارروائی انجام دے گا اور لوگوں کو اس کے اخراجات ادا کرنا ہوں گے۔نوٹس بعنوان ’ہرخاص وعام‘ میں مزید لکھا گیاہے کہ جو لوگ ناجائز تجاوزات ہٹانے میں ناکام رہے، ان کے خلاف قانون کے تحت سخت کارروائی کی جائے گی۔حکام کے مطابق اس کےلئے ضلع بھر کے رہائشیوں کو الگ الگ بے دخلی کے نوٹس جاری کئے گئے ہیں
