مرکزی وزیر داخلہ امت شاہ نے کہا ہے کہ جموں و کشمیر کو ریاست کا درجہ دینے کا معاملہ اسمبلی انتخابات کے بعد سامنے آئے گا اور انتخابات کے وقت کے بارے میں فیصلہ الیکشن کمیشن کرے گا۔کشمیر نیوز سروس( کے این ایس ) کے مطابق ایک خبر رساں ایجنسی کے ساتھ خصوصی انٹرویو میں شاہ نے یہ بھی کہا کہ جموں و کشمیر میں حالات میں بہتری آئی ہے اور دہشت گردیسے متعلق اعداد و شمار سب سے کم ہیں۔
شاہ نے کہا کہ جموں و کشمیر سے متعلق آرٹیکل 370، جسے 2019 میں بی جے پی کی قیادت والی حکومت نے منسوخ کر دیا تھا، نے ملک کو نقصان پہنچایا ہے۔انہوں نے کہا کہ جس طرح جموں و کشمیر میں ترقی ہو رہی ہے، دہشت گردی آہستہ آہستہ ختم ہو رہی ہے۔انہوں نے کہا کہ تمام اعداد و شمار دیکھیں، جموں و کشمیر میں کافی تبدیلی آئی ہے۔سوالوں کا جواب دیتے ہوئے، شاہ نے کہا کہ حکومت بائیں بازو کی انتہا پسندی سے نمٹنے میں موثر رہی ہے اور خالصتان کے ہمدردوں کی سرگرمیوں پر گہری نظر رکھے ہوئے ہے۔وزیر نے کہا کہ وہ جموں و کشمیر میں انتخابات کے وقت پر تبصرہ نہیں کر سکتے۔میں نے واضح طور پر کہا تھا کہ جموں و کشمیر میں انتخابات کے بعد ریاست کا درجہ بحال کیا جائے گا۔